Les XIV Xuntes d'Escolines y Escolinos d'Avilés van contar cola participación de 530 alumnos

L’Auditoriu del Centru Niemeyer va acoyer esti miércoles les XIV Xuntes d'Escolines y Escolinos d'Avilés cola participación de mediu millar d’alumnos y alumnes. Mentes, los Centros Socioculturales de la villa entamen cuentacuentos n’asturianu esta selmana.

Los escolinos y escolines de cuartu, quintu y sestu de Primaria de les escueles Versalles, Villalegre, La Carriona-Miranda, Enrique Alonso, Apolinar García Hevia, Llaranes, Santo Tomás, Salesianos, San Nicolás de Bari, Principáu y el Centru Rural Agrupáu Castrillón-Illas, y los de Institutos de Secundaria de La Madalena, el Númberu 5, Menéndez Pidal y La Xungarosa, van presentar les sos propuestes preparaes mientres les selmanes últimes sobre’l tema d’esti añu: la lliteratura n’asturianu fecha por muyeres. Nel casu de los más pequeños va consistir n’actuaciones musicales, teatrales y llectures, mentes que los mayores van aportar trabayos d'investigación, power points y audiovisuales.

Actores y actrices de Nun Tris Producciones van encargase de la coordinación del eventu, con aniciu previstu pa les 10.30 hores, que tien como cartelu oficial al ganador II Concursu de Cartelos pa Centros de Primaria, que llevó Elisabeth Jiménez Gabarri, del Colexu Públicu La Carriona-Miranda. Ésti reflexa a Xosefa Xovellanos escribiendo nunos manuscritos nomes d'otres lliterates asturianes, trabayu pol que la escolina llevó 150 euros y la posibilidá d’espublizalu.

Cuentacuentos a les 18 hores

Esti martes, la Estaya de la Llingua d’Avilés entama’l primer de los cuatro cuentacuentos n’asturianu por Susana Sela previstos esta selmana y el martes 9, toos ellos a les 18 hores. Tres el de Bances Candamo d’esta tarde van siguir el de la Biblioteca La Carriona (mañana), el de La Luz (xueves) y el de Los Canapés (martes 9).

Na semeya, Montserrat Machicado y Yolanda Alonso.