Les viesques y los montes

5 Xunetu, 2014
Asturies.com

Una viesca ye un terrén ocupáu de manera mayoritaria por árboles y maleza. Estes comunidaes de plantes cubren una bona parte del planeta y faen una función perimportante, al ser reguladores del clima y conservadores del suelu. Amás, sirven d’habitat de numberoses especies d’animales.

N’Asturies, por mor de la so orografía, les viesques asítiense de manera principal nos montes, ellevaciones de terrenu onde la vexetación medra de forma llibre. Sicasí, los montes más altos d’Asturies nun tienen flora na so cume.

Vista de Muniellos

¿Sabíes que…? L’aición del home ta finando con superficies grandes de viesques a lo llargo del planeta. Los coleutivos ecoloxistes alerten d’esta situación que pon en peligru la supervivencia de numberoses especies y l’equilibriu del planeta. Pon el to enfotu en camudar esta situación.

La superficie qu’ocupen les viesques n’Asturies calcúlase en 10.600 quilómetros cuadraos, lo que supón cerca d’un 30 por cientu del total del país. El más conocíu de toos ye’l de Munieḷḷos, que ta protexíu baxo la figura de Reserva Natural Integral; tamién ye Reserva de la Biosfera por mandatu de la UNESCO. Ésti asítiase ente los conceyos de Cangas del Narcea, Ibias y Degaña y catalógase como la mayor carbayera del Estáu y una de les meyor conservaes d’Europa. En Munieḷḷos tamién xorrecen fayes y bedulios.

La viesca d’Ermu, tamién en Cangas del Narcea, y la de Peloñu, en Ponga, son otros espacios que destaquen pola so riqueza. Los carbayos, abedules, castaños o fayes son dalgunos de los nomes que conformen el llistáu d’árboles autóctonos asturianos. Nella nun tan los ocalitos, pese a ser tan numberosos. Esta especie ye orixinaria d’Australia y plantóse n’Asturies magar la década de los 60 pola so producción alta de madera.

Torre Cerréu

¿Sabíes que…? Pa protexer Munieḷḷos, l’accesu de persones a la viesca ta restrinxíu. Asina, namái venti individuos pueden visitar al día esta maravilla natural.

La Cordelera Cantábrica ye la cadena montañosa que separa Asturies de la meseta. Ésta naz en Galicia y s’estiende hasta Navarra, anque la zona asturiana ye la más destacada. El so puntu más altu ye Torre Cerréu, na divisoria ente Asturies y Lleón, con 2.648 metros d’altor, anque’l monte más conocíu ye’l Picu Urriellu, asitiáu nos Picos d’Europa (2.519).