Les vacunes

Una vacuna ye un preparáu médicu que se pon a una persona o a un animal pa inmunizalu d’una enfermedá. Al pocu de nacer, a los 2 meses anguaño, recibimos les primeres pa combatir diferentes microorganismos que provoquen les enfermedaes más comunes, anque l’aplicación de les vacunes nun ye obligatoria.

El mou de funcionamientu de les vacunes consiste na introducción del cuerpu un axente asemeyáu al microorganismu que causa la enfermedá. La reaición del sistema inmunolóxicu ye la creación d’anticuerpos, que lu destrúi, deprendiendo a combatilu pal futuru, de manera que previén una posible infeición col pasu’l tiempu.


Vacunación.
¿Sabíes qué…? La viruela ye la única enfermedá que’l ser humanu consiguió desaniciar. Les vacunes ayuden a prevenir munches otres.

Esta enfermedá, la viruela, provocó a lo llargo de la historia una gran mortalidá y el trabayu de científicos contra la mesma foi la que provocó’l descubrimientu de lo qu’anguaño conocemos como vacunes. Anque hai constancia de que nel sieglu X en China yá s’inoculaben de manera deliberada’l virus de la viruela, foi nel sieglu XVIII n’Inglaterra cuando s’empezaron a estudiar.

L’aristócrata Mary Montagu conoció nun viaxe pel Imperiu Otomanu, na actual Turquía, esta práutica de la inoculación y tráxola a Inglaterra, emplegándolo colos sos fíos con ésitu. Años más tarde, al rodiu’l 1796, el médicu rural Edward Jenner, observara que les llecheres solíen contrayer la viruela bovina al tar en contautu coles vaques, quedando llueu inmune a la común, lo que lu llevó a investigar al respeuto: inyectaba la variante bovina y los individuos nun contrayíen la humana, estendiéndose esta práutica per Europa y América.


Virus
¿Sabíes qué…? Anque la imaxe que se suel tener de les vacunes ye al traviés d’una inyeición, al ser éstes les más numberoses, hai dalgunes que se tomen de manera oral.

Cien años depués, nel 1880, el quimícu y bacteriólogu francés Louis Pasteur, que conocía la esperiencia de Jenner, contribuyiría al desarrollu de les vacunes al emplegar patóxenos debilitaos artificialmente. Foi él precisamente’l primeru qu’usaría’l términu vacuna, del llatín ‘vacca’, n’homenaxe al avance del inglés cola viruela bovina.

La evolución de la medicina y les vacunes dende entós foi continuu, hasta’l día de güei, na que gracies a elles considérense prauticamente desanicies enfermedaes nun hai tanto comunes como’l sarampión o’l tétanos. Sicasí, hai dalgunes corrientes ideolóxiques, al igual qu’asocedió dende tiempos de Montagu y Jenner, que refuguen les vacunes, inorando les recomendaciones de la Organización Mundial de la Salú (OMS) y poniendo inclusive en peligru vides humanes.

  • ¿En qué consiste una vacuna?
  • ¿Quién foi’l so inventor?
  • ¿Qué vacunes recuerdes que te punxeren?
  • ¿Son obligatories les vacunes?

 

Enllaza’l nome d’estes enfermedaes col datu que más la carauterice

Rabia
 
Sarampión
 
Hepatitis
 
Viruela
 
Gripe
 
Malaria
 
garráse por mordedura d’un animal
produz manches coloraes na piel
afeuta al fégadu
ta desaniciada
la más común
tresmítenla los mosquitos