L'arquitectura tradicional

La casa ye’l centru de la casería y pegada a ella solía tar la corte, col oxetivu de que los animales ayudaran a calentar la casa, yá que d’aquella nun había calefacción nes viviendes. Ésta taba formada pol llar y los cuartos onde durmíen los sos habitantes. Cerca de la mesma taben l’horru o panera.

 

La diferencia ente estes dos contrucciones ta na so forma. Los horros tienen planta cuadrangular y sostiénse por cuatro pegollos, mentes que les paneres cuenten con forma rectangular y seis o más puntos d’apoyu.

Los horros y paneres son tovía mui habituales n’Asturies y tán protexíos, anque la realidá ye que munchos vienense abaxo por mor de la despoblación y la falta d’enfotu de les autoridaes. Dalgunos tán en seriu peligru de desaniciu, como los horros beyuscos, con cubierta a dos agües –el restu tienen cuatro– y menor tamañu.

 

Según la zona, les carauterístiques de la casa son diferente. La casa de corredor quiciabes ye la más estendida, pero tamién hai cases mariñanes, con patín, la terrena, tipu Vidíu, de turria, de bloque, de portal o casía. Más moderna ye la casa d’indianos, viviendes espectaculares que fixeron emigrantes retornaos coles perres feches n’América.

Otres construcciones tradicionales, alloñaes de la casería, son los teitos, chozos y corros. Estos servíen d’abellugu a vaqueiros y tienen forma circular.