La reciella nagua por Los Bolechas
La demanda ente la reciella y l'interés de la empresa editora de Los Bolechas nel doblaxe de temporaes nueves de la serie choquen cola falta d'enfotu por parte de la RTPA. Lo que sí llegará próximamente son llibros nuevos de los personaxes.
Los neños y neñes d'Asturies nun disfrutarán d'episodios nuevos de Los Bolechas; al menos de momento. La RTPA nun tien intención de doblar la segunda temporada pese al interés de la empresa que produz la serie gallega, toda una sensación nel país vecín como amuesen les decenes de capítulos emitíos na TVG, el mediu centenar de llibros espublizaos, la gran cantidá de productos pa neños protagonizaos polos personaxes o la participación d'éstos en campañes entamaes pola propia Xunta.
De momento, la reciella ha de conformase cola reposición de la primer temporada, que l'ente públicu de comunicación tien previsto facer en feches próximes. Tamién pue disfrutar de los dos llibros de Los Bolechas espublizaos hasta'l momentu n'asturianu, 'Cómo ñacemos' y 'El cuerpu humanu', a los que se sumarán otros títulos próximamente por mor de los pidimientos continuos procedentes d'Asturies que lleguen a Galicia.