'La Reciella en Casa: La Cuarentena Presta', 8 actividaes pa estes vacaciones de Selmana Santa

La Reciella en Casa

La Estaya de la Llingua d'Avilés programa pa estos díes un ciclu d'actividaes entituláu 'La Reciella en Casa: La Cuarentena Presta'. Va ser un total de 8 actividaes en llingua asturiana que tolos díes van abrir una puerta a la imaxinación y al pasalo bien pa la reciella al traviés d'Internet.

Cuentacuentos, música y talleres d'escritura, dibuxu, cómic y ropa tradicional van conformar el programa d'esta iniciativa na que participen diferentes profesionales con muncha esperiencia nestos campos. Dende mañana y hasta'l día 13, a partir de les 17 hores y mientres les 24 hores siguientes, va ser posible participar nestes actividaes dende enllaces publicaos na web del SNL avilesín y del Conceyu, amás de nes redes sociales municipales.

El programa de 'La Reciella en Casa: La Cuarentena Presta' ye'l siguiente:

  • Llunes: cuentacuentos 'La cuyarapa Martina', con Ana Morán.
  • Martes: cuentacuentos 'La neña con ales', con Borja Roces.
  • Miércoles: taller 'Faciendo un llibru, dibuxamos y escribimos', con Susana Sela.
  • Xueves: cuentacuentos 'Risines', con Ana Morán.
  • Vienres: taller de cómic con Ruma Barbero.
  • Sábadu: conciertín con David Varela.
  • Domingu: taller de ropa tradicional con Susana Sela.
  • Llunes 13: segunda parte del taller de cómic con Ruma Barbero.