La Reciella de la Factoría abre’l programa de seronda con ‘Tiempu de castañes’
La compañía d’Olga Cuervo va encargase d’abrir esti vienres la temporada seronda d’actividaes de La Reciella de la Factoría cola obra ‘Tiempu de castañes’. La Estaya de la Llingua y ‘Reciella. Families pol Asturianu’ tienen programaos otros dos eventos nesti ciclu.
Cola llegada de la seronda comienza’l ‘Tiempu de castañes’, nome de la obra que va representar Olga Cuervo esta tarde, dende les 19 hores, nel Espaciu Escénicu de la Factoría Cultural d’Avilés, con entrada llibre hasta completar aforu. Con esti cuentu los neños y neñes presentes van poder disfrutar d’histories sobre esta época tan prestosa.
La Reciella de la Factoría va continuar en payares, el día 24, cola obra ‘Contábenmelo en casa’, de Carlos Alba ‘Cellero’, y n’avientu, el día 15, cola III Folixa de Navidá, que va celebrase na Casa la Cultura. Ésta va contar con cuentacuentos, villancicos y una ufrienda’l nataliegu, y nella van tar presentes los Llendadores de la Ría, ayudantes de L’Anguleru.