La madreña
Podemos dicir que la madreña ye ún de los símbolos d’Asturies. De xuru que sabes bien lo que ye y que, inclusive, calzasti unes dalguna vegada, pero nesta ficha didáutica vamos a contate dalgunes coses sobre elles que nun sabíes.
Por si acasu, vamos comenzar definiendo a la madreña como una pieza de calzáu fecha de madera y que cuenta con trés tacos p’apoyar en suelu. El so usu ta venceyáu a los llabores del campu, na güerta o la corte, y protexe los pies de la humedá, yá que la madera ye un material afayadizu p’andar por terrenos embarraos, mui habituales n’Asturies por mor de la nuesa climatoloxía.
Les primeres madreñes yeren d’escarpín, polo qu’éstes yeren robustes y de boca zarrada. Cola evolución de los años y l’emplegu de zapatielles de casa, la so ellaboración modificóse, faciéndose más anches pa poder introduciles nelles.
El madreñeru ye la persona que s’encarga de la creación d’esti calzáu, utilizando delles ferramientes como la llegra, el tronzón, el taladru, el cepillu o’l raseru. La madera escoyida pa esti llabor suel ser la procedente d’abedriu, faya, umeru y castañal.
Según la zona del país, les madreñes tienen unes carauterístiques propies. Suelen ser nidies, barnizaes, pero tamién les hai que tán decoraes o inclusive pintaes, siendo Casu, Somiedu, Ḷḷena y Ayer los conceyos con mayor tradición na so ellaboración.
Nel pasáu había en toda Asturies más de mil madreñeros, pero anguaño’l so númberu anda pela docena. Tamién esiste la so fabricación industrial, por mor de les que les madreñes son entovía mui usaes pola so comodidá y impermeabilidá pa andar pel campu. Asina, nun ye difícil ver a xente usándoles anguaño o nes puertes de les cases.
- ¿Por qué les madreñes tuvieron tantu ésitu?
- ¿Pa qué val la llegra?
- ¿Nes cases, ¿ónde se dexen?
- ¿Qué tipos de madreñes conoces?