La llingua asturiana ye l’idioma d’Asturies. L’asturianu surdió na Edá Media, demientres la existencia del Reinu d’Asturies, y foi’l resultáu de la evolución del llatín nes tierres de los nuesos antepasaos. De fechu, al tener el so orixe nel llatín, que yera l’idioma de los antiguos romanos, ye una llingua hermana d’otres col mesmo orixen como l’italianu, el francés, el catalán, el gallegu, el castellán, el corsu, l’occitanu o’l portugués, ente otres.
Como tolos idiomes, l’asturianu tien delles variedaes. Igual que nun se fala esactamente’l mesmo castellán en Santander qu’en Sevilla, tampoco se fala esactamente’l mesmu asturianu en Cangues d’Onís qu’en Tinéu. Hai pequeñes diferencies pero l’idioma ye’l mesmu. N’Asturianu tenemos tres grandes variedaes: l’asturianu occidental, el central y l’oriental.
Manifestación a favor del asturianu
¿Sabíes que…? Anguaño existe una lliteratura n’asturianu de gran calidá y bayura temática. Tienes llibros pa neños y mozos, noveles, obres de teatru, d’historia, de poesía. cómics etc .Ente los munchos autores qu’hai rescamplen Xuan Bello, Berta Piñán, Antón García, Vicente García Oliva, Xulio Arbesú, Xandru Fernández o Xuan Xosé Sánchez Vicente ente otros.
Durante bona parte de la Eda Media l’asturianu foi la llingua de casi tola población, emplegándose cada vez más nos documentos oficiales de la época y espardiéndose al sur del Cordal, en tierres de Lleón y mesmamente del noreste de Portugal. Pero cuando Asturies pasó a depender de la corona de Castiella, les autoridaes de la época fueron poco a poco introduciendo’l castellán na sociedá asturiana. Col pasu de los sieglos l’asturianu foi falándose cada vez menos y munches veces siendo oxetu de despreciu o burlla. A pesar d’eso siempre hubo escritores qu’a lo menos dende’l sieglu XVIII usaron l’asturianu, como Antón de Marirreguera, Xosé Caveda, Xuan María Acebal, Teodoro Cuesta o’l Padre Galo.
Llibru n’asturianu
¿Sabíes que…? En 1980 creóse l’Academia de la Llingua Asturiana, una institución oficial que tien como oxetivu crear les normes del nuesu idioma. L’Academia foi l’autora de la Gramática de la Llingua Asturiana, d’un Diccionariu y d’unes Normes Ortográfiques, ferramientes qu’usamos pa escribir correctamente na nuesa llingua.
Nel sieglu XX la nuesa llingua foi amenorgando la so presencia mesmamente nos pueblos, que ye onde más se falaba. El peligru de desapaición convirtióse en real y eso fixo que dellos asturianos decidieren xuntase pa defender l’idioma. Asina entamó un movimientu de recuperación del asturianu, llamáu surdimientu, que va reclamar que l’asturianu ye una llingua tan digna y válida como les demás y que por ello los sos falantes tienen que tener los mesmos derechos que, por exemplu, los falantes de castellán. Ye lo que se conoz como la oficialidá. Anguaño l’asturianu tovía cuerre seriu peligru de despaición.
- ¿De qué llingua deriva l’asturianu?
- ¿Cuántes variedaes tien la llingua asturiana?
- ¿Qué ye la oficialidá?
- ¿Puedes citar el nome d’a lo menos cinco escritores asturianos?
