La conseyera Berta Piñán sofitó cola so presencia’l Día de la Reciella

Alberto Ferrao y Berta Piñán nel VII Día de la Reciella

Anque l’orbayu acompañó al aniciu de la carrera ‘Entaína’, el tiempu respetó y el Día de la Reciella tornó a ser un ésitu, con cientos de persones acudiendo a lo llargo del día al Muséu del Pueblu d’Asturies. Ente elles, Berta Piñán, primer miembru del Conseyu de Gobiernu n’asistir a esta xornada nes sos siete ediciones.

La xornada d’ociu y convivencia en familia col asturianu como llingua vehicular entamada por ‘Reciella. Families pol Asturianu’ col oxetivu de promover la tresmisión xeneracional del idioma foi un añu más una gran fiesta. Families completes disfrutaron dende les 11 hores de talleres, actuaciones musicales y actividaes, cola carrera de relevos ‘Entaína’ como eventu principal.

La familia Guardado foi nesta ocasión la que simbolizó’l pasu de testigu de la tresmisión xeneracional del asturianu, con Chema entregando-ylu a David y ésti a los pequeños Xana y Mael. Xunto a los Guardado cerca de 200 corredores de toles edaes, ente ellos el socialista Alberto Ferrao, conceyal d’Educación y Cultura –al igual que facía n’ediciones previes la so predecesora Ana Montserrat López Moro, de Foro– y Yolanda González Huego, de Podemos-EQUO.

L’edil pasó tola mañana disfrutando de les actividaes programaes nel Muséu del Pueblu d’Asturies baxo’l lema ‘N’asturianu ¡presta pola vida!’, onde tamién acudió Piñán acompañada del direutor xeneral de Política Llingüística y Normalización Llingüística, Antón García. La conseyera del Cultura, Política Llingüística y Turismu, primer miembru del Conseyu Gobiernu qu’acude al Día de la Reciella, visitó los puestos instalaos na zona del tendayu, foi testiga d’ún de los talleres que se desendolcaben nesi momentu y faló xunto con García colos responsables de Reciella, a los que-yos tresmitieron el so interés en dar más relevancia al Día de la Reciella.

La sorpresa de l’actuación de les pandereteres

Xuegos y exhibiciones de fútbol, baloncestu y skate, talleres de reciclaxe, dibuxu o poesía, y muncha música, sonando en delles ocasiones el cantar de Muga y el Corín de Reciella ‘¡Préstame pola vida!’, tema d’esta edición del Día de la Reciella que ta algamando una repercusión importante en redes sociales. Ente les actuaciones musicales destacó la de les pandereteres de la Escuela de Música A Mansalva, con sede en La Felguera y Marisa Valle Roso y David Varela como profesores de canción asturiana y pandereta.

Na semeya, Ferrao y Piñán coles neñes y neños que participen nun taller.