La bicicleta
Ye ún de los medios de locomoción más prestosos, por nun dicir que’l que más. El fechu de poder montar nél dende bien pequeños y que’l movimientu dependa del to esfuerciu failo divertíu y atrautivu. Falamos de la bicicleta. ¿Quién nun tien una?
Millones de bicicletes percuerren carretes, cais y caleyes de tol mundu, convirtiéndose nel vehículu más numberosu. El so creador foi’l barón Von Drais, nel 1817, esto ye, hai 200 años. Foi en Mannhein (Alemaña) y nun contaba con pedales; tratábase d’un aparatu de madera y ruedes de fierru que se propulsaba puxando colos pies.
Bicicleta de 1865.
La incorporación de los primeros pedales a esti inventu llegó nel 1839 de la mano del escocés Kirpatrick McMillan, que nun llegó a patentar la idea. Nel 1862 los franceses Ernest y Pierre Michaux fadríen popular la so versión con pedales qu’avanzaría una década más tarde cola ampliación de les ruedes motrices p’aumentar la velocidá de la bicicleta, dalgo que provocaría munchos accidentes al elevar el centru de gravedá de les mesmes.
L’apaición de la cadena, nel 1885, pol inglés John Kemp Starley, y l’inventu de los neumáticos, nel 1888 pol escocés John Boyd Dunlop, cambiaron totalmente la historia de la bicicleta, convirtiéndolu nun vehículu más útil y seguru. Empezaba asina la era dorada de la bicicleta.
Bicicletes de carrrera.
A lo llargo del sieglu XX foron incorporándose delles meyores que fixeron la bicicleta más cómoda d’usar y menos pesada. La teunoloxía aplicada al desarrollu deportivu del vehículu ayudó a algamar estos avances.
Anguaño, la bicicleta ye emplegada tanto nel deporte como nel tresporte per ciudá, dalgo que vien aumentando sobre manera n’Asturies nos años últimos. Asturies tamién ye un paraísu ciclista pola so orografía, lo que la lleva a ser sede d’espectaculares etapes ciclistes de nivel profesional. Los Llagos, el Naranco, L’Angliru o’l Cuitunigru son dalgunes de les cimes más conocíes.
- ¿Cómo se desplazaba la primer bicicleta de la historia?
- ¿Cuándo s’empieza a facer popular esti vehículu?
- ¿Pa qué s’utiliza anguaño sobre manera la bicicleta?
- ¿Sabríes dicir trés ganadores de la Vuelta a Asturies?