L’Anguleru entra esti llunes n’Asturies pel ríu Nalón

‘L’Angulina’, el barcu de L’Anguleru’, yá ta nel mar Cantábricu procedente de los Sargazos de camín p’Asturies pa repartir en Nuechebona los regalos de les neñes y neños asturianos. L’Arena espera la llegada d’esti personaxe pa les 18 hores.

Natural d’Asturies, anque residente n’América, nel mar de los Sargazos, onde cuida de les anguiles y les angules. L’Anguleru viaxa nestes feches al so país na so llancha pa pescar angula en Nuechebona, vendela, y coles perres que saque, mercar regalos a tolos neños y neñes asturianos, qu’entrega esta mesma nueche. L’Anguleru vien en Navidá porque ye época d’angula y entra n’Asturies pel ríu Nalón, onde los guaḥes de L’Arena salen tolos años a recibilu. Darréu, esti personaxe percuerre tolos llugares d’Asturies onde hai agua en busca d’angula. Si los reis de la casa dexen un gorru de llana en Nuechebona baxo l’árbol de Navidá y dalgo de comer y beber pa que pueda reponer fuercies, a la mañana siguiente van atopar los sos regalos nesi mesmu llugar.

Según confirmaron fontes del Conceyu de Sotu’l Barcu, la llegada d’esti personaxe popular espérase pa les 18 hores nel puertu de L’Arena. Ehí ta previsto que faiga una cabalgata peles cais del pueblu y que salude a les neñes y neños asturianos del conceyu y de toda Asturies que s’averen a recibilu. Darréu va ponese manes a la obra pa pescar angula per tol país y entregar esta nueche los regalos a aquellos que foron bonos a lo llargo del añu. L’Asociación Cultural Garabuxada yá tien previstos tolos detalles pa qu’a L’Anguleru nun-y falte de nada na so parada en L’Arena, anque pide la collaboración de la xente pa que lleve faros qu’iluminen a esti personaxe hasta’l puertu y que, nel casu de que sía posible, se vista con ropa d’agua, chubaqueru y gorru de llana.