L’Anguleru: “Nunca recibiéramos tantes cartes nin tantos mensaxes de cariñu y sofitu como esti añu ¡Habrá regalos pa toos y toes!”

Queda poco pa la llegada de L’Anguleru, que yá navega n’agües del Cantábricu. Pese a que’l trabayu en L’Angulina ye continuu, el personaxe navidiegu favoritu de los neños y neñes asturianes tuvo tiempu p’atendenos al teléfonu pa esta entrevista.

¿Qué tal va’l llargu viaxe hacia Asturies?

Bien ho. Esti añu nun puedo quexame, minín. Llevo más de 3 selmanes dende que salí de la mar de los Sargazos y, quitando dalgún momentu puntual nel qu’hebo dalgo de marexada, la verdá ye que la travesía a lo llargo del océanu Atlántico ta siendo mui tranquila. Tamién hai que reconocer que L’Angulina ye un barcu estable y enllenu de secretos máxicos.

¿Cuándo tien pensao llegar a L’Arena?

Sobre les 19.30 hores aportaré a Asturies. Entraré pela desaguada del Nalón y fadré la mio primera parada en L’Arena pa participar na tradicional cabalgata que finalizará, como tolos años, na mio vieya y querida rula. 

Pa min la rula siempre foi sinónimo de felicidá (emociónase pel filu telefónicu). La recompensa al trabayu duru, la esperanza de los más necesitaos y la ilusión de los más pequeños.

¿Qué perspeutives de pesca tien pa esta nueche?

Perbones, minín. Anque últimamente nos ríos asturianos nun hai mucha angula, la enigmática lluz del farolín de carburu fai qu’estos misteriosos pexiquinos tresparentes s’acerquen al chalanu. La maxa de la Navidá encárgase del restu, multiplicando les angules una y otra vegada dientro’l serazu hasta enllenar tolos caxones onde se recueyen estes maraviyoses criatures. Más tarde, col dineru que saquemos de la so venta na rula, compraré los regalos y comenzarémos a repartilos per toles cases con ayuda de los mios célebres agabitadores, los llendadores del ríu.

¿Qué han de facer los neños y neñes pa poder recibir los regalos mañana?

Ye mui importante que trabayaren duru en casa y na escuela, que respetaren y cuidaren el mediuambiente y, por supuesto, qu’escribieren la Carta L’Anguleru.

Camudando de tema, ¿yá pudo falar colos llendadores del ríu?

¡Home, entós! Tamos en contautu continuu mientres tol añu. Infórmenme de manera habitual del estáu de los ríos asturianos. Como sabéis, estos homes y muyeres encárguense tamién de recoyer les cartes y d’échame un gabitu en Nuechebona. Xustamente fale con ellos hai un cachín.

¿Qué-y comentaron? ¿Hai munches cartes esti añu?

Nunca recibiéramos tantes cartes nin tantos mensaxes de cariñu y sofitu. La verdá ye que nun damos abastu. Sicasí, too esti esfuerciu enorme compénsase col placer que nos provoca sentir al alborecer les bullindiegues rises de les neñes y los neños abriendo los regalos enllenos d’ilusión y felicidá. ¿Hai dalgo meyor qu’eso, minín?

¿Qué-yos diría a esos pequeños sobre la importancia de cuidar los ríos?

Los ríos y los mares son fonte de vida y los neños sábenlo. Les viesques de ribera tán enllenos d’animales y plantes que debemos respetar y protexer porque ellos son el meyor indicador de la calidá de los nuesos calces.

Los llendadores tán preparando una serie d’actividaes xunto a delles asociaciones ecoloxistes y de pescadores encaminaes al cuidáu, llimpieza y repoblación de los nuesos ríos. Anque yá vos dirémos informando de too esto, pel momentu prestaríame que los neños y neñes volviesen a recordar a los mayores que nun se pueden tirar basures a los ríos. Pese a que pueda paecer una tontería, tolos años sáquense tonelaes de basura de los nuesos indefensos calces asturianos. ¡Garabuxaes de la ría! ¡Cómo podemos siguir siendo tan irresponsables, minín!

Los mios agabitadores, a lo llargu del añu, informarán a tolos asturianos sobre estes actividaes. Tamos mui esmolecíos pola contaminación de les nueses agües y queremos qu’esto cambie. De xuru que la lluz del farolín de carburu illuminarános el camín.  

Pa finar, ¿habrá entós munchos regalos pa los neños y neñes asturianes?

Los llendadores del ríes tresmitiéronme qu’esti añu los neños y neñes asturianos aplicáronse muncho na escuela, ayudaron en casa a los sos padres y güelos y, al contrario que los sos mayores, tán mui concienciaos col cuidáu de la naturaleza. Habrá regalos pa toos y toes. ¡Prestoses fiestes navidiegues!

¡Ah…, y besiquinos gordinoooossss!