H.oquei patinos

12 Avientu, 2016
Redacción

El ḥoquei ye un deporte que consiste n’introducir una pelota dientro d’una portería mediante l’usu únicu d’un stick. Nél enfréntense dos equipos, que cuenten caún con un porteru que trata d’evitar que’l rival pueda anotar un tantu.

Hai delles modalidaes de ḥoquei, caúna coles sos carauterístiques y regles, anque coinciden nel fundamentu básicu d’esti deporte: sobre prau, sobre xelu, patinos y patinos en llinia, amás de la variante de pista –cancha de fútbol-sala o balonmano–. N’Asturies esiste una tradición importante de ḥoquei patinos, con places importantes en Xixón, Grau, Mieres y Uviéu.

By Caficha (Own work) [CC BY-SA 4.0 (http://creativecommons.org/licenses/by-sa/4.0)], via Wikimedia Commons

Equipu de la Selección Española.

¿Sabíes qué…? El club col meyor palmarés d’Asturies ye de ḥoquei patinos y femenín: el Club Patín Gijón Solimar, que na so época de mayor esplendor compitió baxo los nomes de Biesca y Hostelcur.

En ḥoquei patinos compiten dos equipos compuestos por cinco xugadores, cuatro de pista y un porteru, que se desplacen con patinos de cuatro ruedes paraleles con un frenu. La pista ta cerrada por una valla y tres les porteríes hai espaciu nel que tamién se desendolca’l xuegu. La duración de los partíos ye de 40 minutos a tiempu paráu dividíu en dos partes.

L’equipu más representativu d’Asturies ye’l Gijón Solimar tres encadenar una etapa gloriosa nesti sieglu. Asina, suma cuatro copes d’Europa (2007, 2009, 2010 y 2012), 3 copes de la Reina (2012, 2013 y 2016) y una OK Lliga (2009).

By doe-oakridge [Public domain], via Wikimedia Commons

Partíu en 1946.

¿Sabíes qué…? La modalidá olímpica de ḥoquei ye la de sobre prau. Asturies cuenta con un oru olímpicu, María Ángeles Rodríguez, en Barcelona’92.

En categoría masculina hai dellos equipos que compitieron y compiten al máximu nivel estatal. Ente ellos cabe citar al Cibeles d’Uviéu, que llegó a ganar una Copa del Rei (1980) y tien un subcampeonatu de la Recopa d’Europa (1981); el Club Patín Areces de Grau; y el Club Patín Mieres, ente otros. Dada l’afición esistente n’Asturies, llegó a convocase una seleición asturiana pa disputar un partíu amistosu internacional.

Tampoco nun podemos escaecer al restu de modalidaes que se prautiquen n’Asturies, esto ye, toes a esceición de sobre xelu. Na de sobre prau destaca sobre manera’l llabor del Real Grupo de Cultura Covadonga, con equipos masculinos y femeninos disputando competiciones de nivel estatal.