Historia d'Asturies

20 Agostu, 2014
Asturies.com

La primer presencia humana nel territoriu que güei ye Asturies diose hai unos 300.000 años y atribúise al Homo Heidelbergensis, homínidu asentáu n’Europa hai ente 500.000 y 150.000 años. Nun son restos humanos propiamente, sinón de ferramientes que s’atoparon nel conceyu actual de Valdés. Los restos humanos propiamente dichos más antiguos descubiertos hasta la fecha n’Asturies son los qu’apaecieron na cueva d’El Sidrón (Piloña) nel 1994, y pertenecen al Homo Neanderthalensis, con una antigüedá d’unos 100.000 años.

Col pasu del tiempu, yá na Edá de Piedra –dende’l 800 a.C. hasta la conquista romana en 19 a.C., de manera aproximada– delles foleaes migratories indoeuropees, incluyendo pueblos del troncu celta, instaláronse nel noroeste de la Península Ibérica, amestándose cola población esistente. Los que vivíen alredor del ríu Ástura pasaron a ser conocíos col nome d’ástures, y asina siguieron siendo denominaos polos romanos cuando contautaron con ellos nel sieglo I a.C.

Puente romanu de Cangues d'Onís

¿Sabíes qué…? El ríu Ástura anguaño recibe’l nome d’Esla, anque dalgunes persones apunten que’l ríu al que se referíen los romanos yera’l Seya, que naz cerca del Esla.

Ente’l 29 y el 19 a.C., los ástures llucharon contra los romanos pa defender el so territoriu, el caberu en cayer de la Península Ibérica en manes de Roma. Eliminada la resistencia, l’imperiu romanu procedió a esplotar la tierra de los ástures nel so beneficiu propiu, con especial interés nel oru. Nesti tiempu, principia la romanización d’Asturies, ente lo que destaca l’usu del llatín, que más alantre llevará a la creación de la llingua asturiana.

Nel añu 476 dexaba d’esistir de manera formal l’imperiu romanu d’occidente, anque n’Asturia y nel restu de Hispania’l poder de Roma yá hacía años que fora sustituyíu pol de los pueblos xermánicos llegaos décades atrás. Esos pueblos yeren los suevos, vándalos, alanos y visigodos. D’estos años hai poca información, anque un aspeutu importante ye la cristanización que viven los ástures. Cuando s’anicia’l reinu ástur nel sieglu VIII, el cristianismu ye hexemónicu dafechu, anque les cróniques falen de represión del paganismu n’épocas tan tardíes como la del rei Ramiro (842-850).

Monumentu a Pelayo en Cuadonga

¿Sabíes qué…? Los territorios ástures defendiéronse de la invasión islámica –iniciada sobre’l 711– alredor del 718, provocando’l nacimientu del Reinu d’Asturies, con Pelayo (718-737) como primer rei.

Al morrer García I (910-914), Ordoño II llevó la capital del reinu d’Asturies a Lleón, creándose’l Reinu de Lleón, que s’espandió hacia’l sur quitando tierres a los musulmanes. Nel sieglu XI, Castiella, un condáu de Lleón, fúndese cola corona de Lleón formando’l Reinu de Castiella. Con estos pasos, la nobleza asturiana –que llegó a revelase contra la Corona de Castiella– perdió importancia y Asturies replegóse sobre sí mesma, entrando nuna progresiva fase d’aislamientu que va durar sieglos y que la dexa fuera de los grandes acontecimientos históricos del medievu hispánicu.

Asturies torna a escribir una páxina importante na historia nel 1808, col llevantamientu de la Xunta Xeneral contra la invasión francesa, lo que llevó a la organización d’un exércitu asturianu propiu y al unvíu d’embaxadores a Inglaterra pa pidir sofitu na llucha contra l’exércitu francés. Amás supunxo la creación de la bandera d’Asturies, similar a l’actual, que llevaba la cruz de la victoria y el lema ‘Asturias xamás vencida’.

Cola Revolución Industrial, Asturies ocupa un papel importante dientro del Reino de España gracies al carbón y la siderurxa. A lo llargo del sieglu XX, el país ye sede de delles revueltes obreres, destacando sobre manera la revolución d’Ochobre del 34.