González Rato torna al asturianu la última obra del suecu Forssén

Cubierta de 'El tractorín que quier dormir'

‘Traktorn som så gärna ville somna’, la última obra del ésitosu autor de lliteratura infantil Carl-Johan Forssén, pue disfrutase n’asturianu gracies a la torna de Xesús González Rato. La versión en llingua asturiana lleva’l nome de ‘El tractorín que quier dormir’.

Ediciones Trabe espubliza esti llibru que forma parte d’una triloxía de cuentos p’ayudar a la reciella a garrar el sueñu. Tres un coneyu y una elefanta, que tamién tán disponibles n’asturianu, l’autor suecu emplega a un tractor pa esta historia nueva que promete ser un ésitu de ventes, como les anteriores.

El tractor Torín quier dormir, y lleva nesti llibru a los pequeños a un paséu relaxante y acoyedor per unes tierres onde conoz a los sos collacios nuevos Cenahoria Bocexante, Leon Mediodormíu y les mazanes dormilientes, ente otros. Les ilustraciones qu’acompañen al cuentu son obra de la estauxunidense Sydney Hanson, mentes que la traducción al asturianu ye de González Rato, que tamién tornara al nuesu idioma ‘La vuelta al Mundu n'ochenta díes’, de Jules Vernes; ‘Harry Potter y la piedra filosofal’, de J.K. Rowling; y ‘El coneyín que quier dormir’ y ‘La elefantina que quier dormir’.