González Espina: “L’autoría de los llibros infantiles nun tien la menor importancia; la historia y les imáxenes ye lo que tien que quedar na memoria”

El VII Premiu María Xosefa Canellada de lliteratura infantil y xuvenil recayó na obra ‘Cápsules de tiempu’. El so autor ye Carlos González Espina (Belonciu, 1959), escritor que ta acabante d’espublizar ‘Falar ensin parar’.

¿Cómo recibió la noticia de que llevara esti añu’l María Xosefa Canellada?

Por una llamada d’Ana María Fueyo dende l’Ayuntamientu de Cabranes, acabante fallase’l Premiu. Prestóme munchu la noticia porque amás dase’l casu de que la casa de la mio güela ta ellí mesmu, en Santolaya, a menos de cincuenta metros onde s’aconceyó’l xuráu.

¿Qué supón esti gallardón pa vusté?

María Xosefa Canellada ye una autoridá cimera nos trabayos llingüísticos y na lliteratura de raigañu popular asturiana. Foi tamién piloñesa de nacencia, anque cabranesa de corazón. El so mundu de referencies, por más que con dalgunos años de retrasu, son los mesmos que yo tuvi pa escribir esti llibru que, sin tenelo pensao de mano, bien pudiera lleese como una homenaxe al so llabor de recuperación de la memoria y del imaxinariu popular d’esa fastera d’Asturies.

La obra que presentó lleva’l nome de ‘Cápsules de tiempu’. ¿De qué trata?

A un grupu d’estudiantes de 2075 encárguen-yos un trabayu mui especial. Abrir unes caxes pesllaes 75 años enantes con testimonios escritos, sonoros y gráficos d’esti tiempu cola idea de que los interpretaren xóvenes del futuru ensin los prexuicios de los profesionales de la hestoria o la socioloxía oficial. Pero eses interpretaciones nun van a ser lo importante sinón los propios testimonios d’otru pasáu más remotu tovía.

El xuráu destacó la gran capacidá didáutica del so trabayu.

Nun ye voluntaria pero, si la tien, bienllegada seya. Sí puede ser que se preste a que los llectores se faigan preguntes sobre lo que ye pa ellos consustancial o lo que ye namás que circunstancial: el tiempu, les persones, el trabayu, les coses, la tecnoloxía…

Tamién emponderó la calidá llingüística. ¿Ye ésti un aspeutu más que clave nun llibru de lliteratura infantil y xuvenil?

Quiero pensar que por calidá entiendese naturalidá y que se tán refiriendo a que la llingua escrita d’esti llibru nun ta mui alloñada de la oralidá y que’l vocabulariu ta pañáu del que sintí dende neñu a los paisanos y muyeres del mio pueblu.

¿Cree que los Premios Lliterarios tienen la repercusión que merecen?

Francamente, eso dame lo mesmo. Lo qu’interesa de los premios ye qu’animen, qu’axuden a llegar a fin de mes y qu’averen a dalgunos llectores más.

El fallu del premiu coincidió nel tiempu cola presentación del so llibru últimu, ‘Falar ensin parar’.

Sí, ‘Falar ensin parar’ ye un álbum ilustráu por Marina Lobo, la editora d’Impronta, que lu publica dientro de la serie Fierabrás, onde l’añu pasáu publicara Paco Velasco un preciosu ‘Llibru de les vocales’.

Nél tien una importancia amplia les ilustraciones.

Les ilustraciones tienen tanta o más importancia qu’el testu porque tal paez que les pallabres salgan volando de la boca de la protagonista, más o menos controlaes o más o menos descontrolaes, pa xuntase o pa engardise ente elles. Les pallabres son pa la protagonista d’esti llibru como les cereces: nunca ye quien a sacar una sola; sálen-y como les formigues o los vagones d’un tren, enfileraes; otres veces apiñaes o chocando les unes coles otres…

Vusté nun tenía perfil d’autor de llibros infantiles hasta agora. ¿Por qué trabaya anguaño esti campu?

Les apariencies engañen. Tengo publicaos n’asturianu yá unos cuantos llibros infantiles, pero casi toos con alcuñu, y traducíos al asturianu bastantes más. Lo que pasa ye que soi de los que creen que l’autoría nos llibros infantiles nun tien la menor importancia. Pienso que la historia y les imáxenes son les que tienen que quedar na memoria de los llectores y non el nome del autor.

‘Falar ensin parar’ edítalo Impronta, heredera de Llibros del Pexe, que vusté dirixó xunto con Marina Lobo, responsable anguaño de la editorial y la so esposa. ¿Cómo marcha esti proyeutu?

Esa casa-editorial mantiense porque se sustitui’l factor capital pol factor trabayu y porque la editora pon el so conocimientu y la so sensibilidá como si fuere pal trabayu meyor pagáu del mundu, siendo, como ye, el peor pagáu.

Impronta apuesta de forma importante pola lliteratura pa neños y neñes n’asturianu.

Sí, ye una llinia básica d’Impronta, que tien abiertes tres series infantiles: Fierabrás, d’álbumes; Bonos principios, toos llibros d’Irene Riera –acaben de salir ‘Hai que tomar midíes’ y ‘Queridu día’–; y Menudu Cuentu, del que s’editaron va poco ‘Teba’, de Bernardo Lodares y Carmela Fernández, y ‘Valentín y el monte d’azucre’, d’Alfonso López Alfonso.

¿Cómo ve la salú de la creación de la lliteratura infantil y xuvenil en llingua asturiana?

Soi mal médicu pa esta especialidá pero, proporcionalmente, la calidá de la lliteratura infantil que se publica n’Asturies nun desmerez de la que se fai notres partes.

¿Ye imposible espublizar ensin subvenciones?

Posible sí ye; rentable, non –y con elles y too mui poques veces–.

¿Tán bien enfocaes anguaño o cree que deberíen reformulase?

Igual por deformación profesional –fui bibliotecariu ventipicu años– yera más partiduariu d’un sistema de compres pa biblioteques públiques y escolares que’l de les subvenciones. Polo menos el gastu diba rentar más pa los llectores de los espacios públicos.

¿Tien dalgún proyeutu en mente?

Sí, en mente tengo bastantes coses. A ver si dalguna quier baxar de les muses al teatru.

Yá pa terminar, ¿qué opinión tien d’iniciatives como ‘A la gueta los sueños’?

Nun se pueden tener más que pallabres d’agradecimientu pa los que gasten el so tiempu y les sos fuercies en siguir esti pequeñu mundu cultural y editorial asturianu, y en da-y visibilidá.