Fútbol asturianu
El fútbol ye’l deporte más popular del mundu, con millones de prauticantes y d’aficionaos en tolos rincones del planeta. Trátase d’un prautica que foi evolucionando dende otres disciplines n’Inglaterra, como’l rugbi, y que tuvo’l so desendolcu mientres el sieglu XIX, considerándose l’añu de la so creación’l 1863, cuando aconceyó per primer vegada The Football Association, la federación inglesa, entovía activa.
N’Asturies el fútbol llegó pela mar, al traviés de marineros que desembarcaben en Xixón o trabayadores cualificaos de la industria, y de la mano d’estudiantes de families adineraes que se formaben fuera del país. Asina, la playa de San Llorienzu ye considerada como’l primer campu de fútbol de Xixón y posiblemente d’Asturies, una práutica que prontó llamó l’atención de los mozos asturianos.
La Real Federación de Fútbol del Principáu d’Asturies nun se crearía hasta’l 1915, como Federación Cantábrica de Fútbol, pero la primer competición oficial nel Estáu entamaría nel 1903: la Copa de España, anguaño Copa del Rey. Nestos años fundaríense n’Asturies otros clubes como’l Sporting (1905), el Luarca (1912) y el Titánico (1912), anque’l club xixonés nun debutaría na Copa hasta’l 1917, siendo’l primer asturianu en participar.
Hasta l’añu 1928 nun s’organizaría la Lliga, quedando encuadraos en Segunda División el Sporting y el Real Oviedo, equipu fundáu dos años enantes. Los uviedinos seríen los primeros en competir en Primera División, al xubir nel 1933, mentes que los xixoneses algamaríen la categoría máxima nel 1943, completando dende esi momentu 42 temporaes en Primera por 38 de los azules.
Los mayores ésitos del fútbol asturianu son el subcampeonatu de Lliga del Sporting de la temporada 78-79 y les dos de Copa de la 80-81 y de la 81-82, amás de les seis participaciones na vieya Copa UEFA de los roxiblancos y la del Oviedo de la 91-92. Tamién foi histórico la celebración de seis partíos de la primer fase del Mundial del 82 n’El Molinón y el desapaecíu Carlos Tartiere, en concreto del grupu 2, que conformaben la República Federal d’Alemaña, Austria, Arxelia y Chile.
Otros clubes destacaos del fútbol asturianu, con pasu pela Segunda División, son l’Avilés, l’Unión Popular de Langreo (tamién el Círculo Popular de La Felguera, enates de la fusión col Racing Club de Sama), el Caudal y l’Ensidesa. En fútbol femenín, con munchu puxu nos años últimos, el recién nomáu Real Oviedo Femenino consiguió disputar 22 campañes na categoría máxima –baxo la denominación d’Oviedo Moderno principalmente–, y el Gijón Fútbol Femenino, una temporada.
- ¿Ónde s’inventó’l fútbol?
- Cita les ciudaes d’onde son los clubes más antiguos d’Asturies.
- ¿Qué se celebró en Xixón y Uviéu nel 1982?
- ¿Qué competición europea disputó’l Sporting y l’Uviéu al mesmu tiempu?