Folixa de Navidá n'Avilés

Esti vienres, 15 d'avientu, a les 19:00 hores, la Casa la Cultura d'Avilés acueye la cellebración de la III Folixa de Navidá.

L'actividá incluye'l cuentacuentos Un nataliegu perbullindiegu, la visita de Llendadores de la Ría d'Avilés y la llectura del conxuru al Nataliegu por escolines y escolinos del Colexu  La Carriona. Amás entregaráse una placa a la "Mestra Llendadora del añu", qu'en 2017 va ser Victoria López Fernández "Lolina, la Rulera".

L'actividá va entamar con unos versos que lleerá la poeta avilesina Esperanza Medina, xunto con un grupu de neños y neñes del CP Sabugo, que va tar con ella nel escenariu. Dempués tendremos el cuentacuentos Un nataliegu perbundilliegu, representáu pola actriz Olga Cuervo.

Más tarde llegará'l turnu de la llendadora y del llendador de la Ría d'Avilés, Lolina y Xesús, que van repartir unes castañes de chocolate a la reciella y recoyer les cartes pa l'Anguleru. Son unos personaxes n'orixe avilesinos inspiraos nos primeros trabayadores de la Rula d'Avilés y que, amás de defender la pesca tradicional, ayuden a L'Anguleru nel so trabayu de repartir regalos na nueche del 24 d'avientu.

A eso de les 19.30 hores, neños y neñes del Colexu de La Carriona fadrán la ufrienda los bollinos y lleerán los versos del conxuru d'El Nataliegu. Darréu, entregaráse una placa como homenaxe a una persona rellacionada cola mar o la Rula d'Avilés.

Nesti casu l'homenaxe va facese a Victoria López Fernández 'Lolina la Rulera'. que dedicó la so vida profesional a la Rula d'Avilés, onde trabayó 49 años como telefonista y auxiliar de caxa. Con esta placa reconózse-y el so llabor profesional y la so llucha por caltener viva la historia del sector pesqueru avilesín. 

A les 20:00 dará un conciertu'l coru infantil del Colexu Públicu de Sabugo, interpretando'l Villancicu de l'Anguleru y el Corín de la Escuela de Música de Mieres pondrá voz a un ensame villancicos ente los que se va estrenar,el Villancicu d'El Nataliegu, del que ye autora Reyes Duarte, compositora y profesora del Conservatoriu Elemental de Música de Mieres.

El Villancicu d'El Nataliegu ye la segunda composición de Reyes Duarte, con lletra de Víctor Raúl Pintado Rey, dempués del esitosu Villancicu de L'Anguleru que s'asoleyó en 2009. L'envís de Reyes componiendo estos villancicos ye'l de llegar a les families asturianes pa poder recuperar les tradiciones y disfrutar d'un cantar cenciellu, fácil p'acordase de la lletra y que pueda baillase. El Nataliegu ye una de les tradiciones asturianes más vieyes y fai referencia a un tueru que se quemaba na nueche del 24 d'avientu y del que recoyía la ceniza al día siguiente pela mañana pa poder conservalo tol añu pa protexer la casa y la familia.

En terminando l'actu  neñes y neños  van poder retratase col Llendador y la Llendadora a la entrada l'auditoriu, asina como con L'Anguleru y El Faroleru, que vien dende Candás pa visitanos.

L’Anguleru

L'Anguleru vive tol añu na Mar de los Sargazos, curiando les anguiles y les angules, hasta que'l 24 d'avientu llega a Asturies na so chalana que se llama L'Angulina y aprovecha pa pescar angula, vendelo na rula y comprar regalos pa neños y neñes coles perres de les ganancies. Entra n'Asturies pel ríu Nalón y les persones que viven en L'Arena recíbenlu con una cabalgata. Dempués d'esti recibimientu, percuerre ríos y llagos pa visitar tolos llares asturianos. Pa reponer fuerces, neños y neñes tienen que dexar un gorru llana al pie  l'árbol de Navidá con comida y bebida.

Programación

 19:00: Llectura de versos por Esperanza Medina xunto al alumnáu del CP Sabugo

 19:05: Cuentacuentos: Un nataliegu perbullindiegu, por Olga Cuervo

 19:20: Recibimientu de Llendadores de la Ría: (Lolina y Xesús, los Ruleros)

 19:35: Ufrienda y llectura del conxuru d'El Nataliegu pol alumnáu del CEIP La Carriona

 19:45: Entrega de la placa conmemorativa a la "Mestra Llendadora 2017"

 20:00: Conciertu de la Reciella

• Villancicu de L'Anguleru. Coru del CP Sabugo. Autora: Reyes Duarte. Direutor: Francisco Javier Miranda Camblor
• Villancicos de Navidá. Corín de la Escuela de Música de Mieres. Direutora: Reyes Duarte

 20:15: Agasayu de Lolina y Xesús, los Ruleros y Llendadores de la Ría a los neñes y les neñes; repartu de castañas de chocolate.