Villes y ciudaes

20 Ochobre, 2014
Asturies.com

Una ciudá ye una población de tamañu grande nel qu’habita una comunidad humana amplia organizada. Ye difícil diferenciar una ciudá d’un pueblu, más allá del númberu de persones que viven nella. Asina, dalgunes clasificaciones consideren como ciudá a les urbes con más de 10.000 habitantes.

Anguaño tampoco esiste muncha diferencia ente ciudá y villa, polo que p’atopar dalgún rasgu que-yos faiga carauterísticos habría que mirar al pasáu. Dalgunes poblaciones de cierta entidá recibieron mientres la Edá Media’l títulu de ‘villa’ como reconocimientu, anque les que teníen títulu de ‘ciudá’ contaben con preferencies mayores. N’Asturies tamién se denomina villa a la capital del conceyu.

Vista del puertu de Xixón de Pedro Texeira, 1634

¿Sabíes qué…? Xixón tien el títulu de villa y ye la ciudá con más población d’Asturies, con 277.000 habitantes.

La capital d’Asturies ye Uviéu, la segunda ciudá más poblada del país, con 225.000 habitantes. Yá lo fuera en tiempu del Reinu d’Asturies, ente los años 791 y 910, depués de Cangues d’Onís, Samartín del Rei Aurelio y Pravia, y enantes del treslláu de la corte a Lleón.

La mayor parte de la población n’Asturies vive na fastera central, qu’inclúi la nomada dende hai poco Ciudá Astur, el triángulu que conformen Avilés, Uviéu y Xixón y les dos cuenques mineres. Nesta zona viven 850.000 persones sobre una población total de poco más d’un millón.

Casa del conceyu de Bual, Premiu al Pueblu Exemplar d'Asturies 2014

¿Sabíes qué…? Asturies sufre un problema importante, que se repite en tol mundu occidental, como ye’l despoblamientu rural. Les persones, énte la falta d’oportunidaes nel so llugar de nacencia, treslládense a vivir a les grandes ciudaes, provocando un progresivu abandonu del mundu rural.

La fastera occidental y oriental son zones onde sufren sobre manera esti despoblamientu rural. Ente los diez conceyos más poblaos, nengún ta nestes dos zones, siendo Cangas del Narcea l’undécimu na llista con dalgo más de 14.000 habitantes, cifra en descensu progresivu na que tamién se mueve Llanes, pel oriente.

Los conceyos menos poblaos d’Asturies son Yernes y Tameza, con menos de 200 habitantes, siguíos de Pezós y Santu Adrianu, con delles decenes más.