Oriente d'Asturies
L’oriente d’Asturies ye la zona del país que va dende Colunga hasta la frontera con Cantabria, establecida pol ríu Deva. Trátase de la fastera asturiana qu’acueye menor población, con unos 80.000 habitantes, anque tien una importante riqueza, sobre manera pol turismu
Virxe de CuadongaHasta l’actual división del Reinu d’España en provincies, que nació nel 1833 por Javier de Burgos, Asturies taba formada por la Asturies d’Uviéu y l’Asturies de Santiyana. La primera llegaba hasta Ribeseya, siendo Ribadeva y les Peñamelleres de la de Santiyana, que llagaba pol oriente hasta Astillero. Con esta modificación, Asturies quedó separtada, creándose la provincia de Santander.
Pese a esta división, nel occidente de Cantabria tovía tien munchu puxu la cultura asturiana, como amuesa la vitalidá de la canción asturiana nel llugar o la pervivencia de la llingua en delles zones. Asina, ye mui habitual ver a intérpretes cántabros nos concursos de tonada que se celebren na nuesa xeografía.
Vista costera de Cué, Llanes.La fastera oriental d’Asturies ye, con permisu de Xixón y Uviéu, la más turística del país. Les playes de la zona, Llanes, Ribeseya, Cangues d’Onís y los Picos d’Europa son enclaves que reciben cada añu a miles de visitantes de dientro y fuera del Estáu.
Sicasí, el llugar más emblemáticu del oriente d’Asturies ye Cuadonga, onde ta asitiáu el Real Sitiu de Cuadonga, cola Santa Cueva qu’acueye la imaxe de la Santina o Virxe de Cuadonga. Cuenta la lleenda qu’ayudó a Pelayo a vencer la batalla desendolcada nesi mesmu llugar nos primeros años del sieglu VIII contra los musulmanes qu’ocupaben el territoriu astur.
- ¿Cómo se llama la llingua asturlleonesa que s’emplega en Cantabria?
- ¿Qué conceyos asturianos formaben parte de l’Asturies de Santiyana?
- Cita dellos reclamos turísticos del oriente asturianu.
- ¿Quién foi Pelayo?