Los bolos

El deporte tradicional con más raigañu anguaño n’Asturies son los bolos. Son munchos los xugadores, mozos y non tan mozos, que prautiquen esti deporte en cualquiera de les sos munches modalidaes.

N’Asturies prautíquense diferentes tipos de bolos: cuatriada, bolu palma, batiente, bolu celta, bolu vaqueiru, dexabolu, pasadiez de Somiedu, cuatrín d’Agones… En total hai 43 modalidaes, según recueye Carlos Suari, ún de los mayores espertos en bolos, nel so ‘Atles de los bolos asturianos’.
 
DexaboluDexabolu
¿Sabíes qué…? La modalidá más prauticada n’Asturies ye la cuatriada, que se xuega sobre manera nel centru del país.

La bolera de cuatriada tien 25 metros de llargo y 5 d’anchu, y divídese en trés zones: tiru, zona intermedia y castru, onde s’asitien los diez bolos y el biche –un bolu de tamañu menor–. L’oxetivu del xuegu consiste en derribar el mayor númberu de bolos posibles y que la bola, pol efeutu, termine na zona de cuatriada, marcada pol biche, o derribe ésti. Cuando’l biche ta a la izquierda, dizse que se tira ‘pa la mano’, mentes que si ta pa la derecha, denomínase ‘pal pulgar’.

La Federación Asturiana de Bolos entama munches competiciones de cuatriada, tanto nel formatu individual como por peñes, nes munches boleres esistentes n’Asturies. Cada vegada más hai más xugadores mozos, con torneos especiales pa ellos. ¡Cómo nun t’animes a xugar!

 

Bolu celtaBolu celta
¿Sabíes qué…? La cuatriada tamién se xuega fuera d’Asturies, inclusive al otru lláu del Atlánticu. La razón ye que los emigrantes llevaron el xuegu p’allá y construyeron boleres nos centros asturianos.

Les otres modalidaes federaes de bolos son batiente, celta, lleonés, palma, rodao y vaqueiro. A ellos hai que sumar el bowling, d’orixe estauxunidense, que se prautica namái na bolera esistente nel centru comercial Parque Principado (Siero).

Si quies conocer más sobre esti deporte tan prestosu pues consultar el ‘Atles de los bolos asturianos’ de Suari, onde tán bien esplicaos les 43 modalidaes que se prautiquen n’Asturies. Tamién ye mui afayadizu ‘El pallabreru de los bolos’ qu’editó la Oficina de Normalización Llingüística de Xixón.

  • ¿A qué se llama bolu?
  • ¿Cuála ye la modalidá que se prautica na to zona?
  • ¿Qué hai que facer na cuatriada?
  • Cita trés peñes de bolos d’Asturies.

 

Enllaza estes poblaciones col xuegu más prauticáu na so zona:

Las Bárzanas
 
La Pola Siero
 
Tinéu
 
Llanes
 
Cangas del Narcea
 
La Pola Somiedu
 
Batiente
Cuatriada
Celta
Bolu palma
Vaqueiru
Pasadiez