L'Occidente d'Asturies

17 Xineru, 2015
Asturies.com

L’occidente d’Asturies ye la fastera del país comprendida ente la frontera con Galicia, establecida nel Eo, y la desembocadura del ríu Nalón. Por motivu de la incomunicación que vivió dende cuantayá Asturies, esta zona ye quiciabes la más desconocida del nuesu territoriu pal restu de la población.

Del ríu Navia pal este fálase la otra llingua del país xunto col asturianu, que ye la tradicional, y el castellanu. Trátase del gallego-asturianu, tamién conocida como eonaviego o fala, esti términu últimu’l más utilizáu ente la población del llugar. Mentes, nel restu del territoriu fálase asturianu occidental.

Castru de Cuaña

¿Sabíes qué…? L’eonaviego ye considerada una llingua de transición ente’l gallegu y l’asturianu.

Esta zona tien un patrimoniu cultural-artísticu perimportante. Son munchos los castros que s’alcuentren nesta fastera, como’l de Cuaña, el de Mohías (Cuaña) o’l de San Isidro (Samartín d’Ozcos), por citar trés. Tamién ye posible ver construcciones más modernes, anguaño en retrocesu, como chozos o teitos, que servíen de refuxu a pastores.

Los vaqueiros d’alzada taben precisamente asentaos nel occidente d’Asturies. Esti grupu cultural vivía de la ganadería, faciendo un treshumancia estacional. Asina, xubíen a les brañes en branu colos son animales, pa tornar a les sos zones de residencia n’iviernu. Al ser un ensame mui zarráu, los vaqueiros caltuvieron tradiciones y un folclór propiu.

Boda vaqueira

¿Sabíes qué…? La cultura vaqueira ye entovía mui desconocida y constitúi una de les cultures vives d’Asturies más importantes, xenerando interés inclusive fuera de les nueses llendes.

Ún de los productos estrella del occidente del páis ye’l vinu. Nos conceyos de Cangas del Narcea, Ayande, Degaña, Grandas, Ibia, Eilao y Pezós, danse les condiciones meteorolóxiques pa la ellaboración d’esta bébora, cola carauterística propia de ser viñes de montaña. Dende’l 2009 comercialízase baxo la Denominación d’Orixe Protexida Cangas, tanto tinto como blanco, y faise con uves autóctones.

Ente los xoyes naturales coles que cuenta l’occidente asturianu hai que destacar Munieḷḷos, nos conceyos de Cangas y Ibias. Trátase de la mayor carbayera del Estáu y una de les más importantes d’Europa. Declaróse Reserva de la Biosfera pola UNESCO nel 2000 y sirve d’hogar a munchos animales, ente ellos al osu pardu.