Les fiestes

7 Ochobre, 2014
Asturies.com

Una fiesta ye un periodu de tiempu nel que nun llugar celébrase una folixa. Casi toles parroquies, pueblos, villes y ciudaes d’Asturies tienen les sos fiestes. Celebrénse a lo llargu de tol añu si bien nel branu ye cuando más hai.

N’Asturies celébrense fiestes comunes a otros llugares d’Europa o del Mundu como la navidá o l’antroxu pero tamién tenemos fiestes propies. Les fiestes tradicionales son les romeríes, qu’entamen al alborecer cuando una pareya de gaita y tambor va tocando pieces pa esconcosar a los vecinos. Tamién suelen tirase volaores. Ye l’alborada.

Pareya de gaita y tambor

¿Sabíes que…? En munches villes del conceyu de Llanes nes fiestes los mozos corten y lleven pel pueblu al llombu un arbolón de más de 30 metros d’altura qu’acaben plantando nun prau o a la vera la ilesia. Llámase la h.oguera.

Darréu puede haber una procesión del santu o la santa del llugar, y na puerta la ilesia faise la puya’l ramu, que ye una puya o subasta de roscos de pan qu’ayuden a pagar la fiesta. Suel haber tamién bailles y música del país, y tamién xuegos y deportes tradicionales como los bolos, la llave, el tiru cuerda o la corta de troncos ente otros. Depués suel entamase una comida ente tolos vecinos y a veces faise una xira pela tarde, onde tola xente va merendar nun prau cercanu, normalmente comen productos típicos como bollos preñaos, empanaes, tortielles, embutíos y too ello acompañao de sidra. Yá de nueche hai verbena, onde un grupu o una orquesta da’l pieslle a la xornada fiesta col baile.

Baile asturianu

¿Sabíes que…? El pregón de L’Amuravela siempre se diz en llingua asturiana. En concreto faise un repasu a l’actualidá del añu del conceyu, d’Asturies y del mundu en pixuetu, que ye la variante del asturianu que se fala en Cuideiru.

N’Asturies rescamplen munches fiestes, quizás les más conocíes son L’Amuravela en Cuideiru, los Güevos Pintos y el Carmín en La Pola Siero, el Festival de la Sidra de Nava, el Dia d’Asturies y la Selmana Grande en Xixón, L’Ascensión, el martes de campu y San Mateo n’Uviéu, La Regalina en Cadavéu, la Fiesta’l Corderu nel prau L.lagüezos o la fiesta de La Guía en Llanes.