La televisión

La televisión defínese como un sistema pa la tresmisión y recepción d’imaxes en movimientu y soníu per aciu d’ondes hercianes. El so orixe pue establecese nel telescopiu del italianu Galileo Galilei, creáu nel 1609, anque hasta’l 1884, cola invención del ‘Discu de Nipkow’ por parte del alemán Paul Nipkow nun se da’l primer avance seriu no que ye la televisión.

 

El rusu Vladímir Kozmich Zvorykin, tres pasar pel llaboratoriu del estauxunidense Philo Taylor Farnsworth, foi cola invención del iconoscopiu’l nos primeros años de la década de los 30 el verdaderu artífice de la televisión tal y como la conocemos anguaño: la televisión lletrónica. Les primeres emisiones regulares tendríen llugar nel Reinu Xuníu y Francia nel 1937.

Nel Estáu español éstes tardaríen en llegar 19 años. Nun sería hasta’l 1956 cuando se fundara Televisión Española (TVE), aniciando les sos emisiones el 28 d’ochobre d’esi mesmu añu. La so introducción nes viviendes foi espectacular, desplazando poco a poco a la radio. Nel 1966 nacería la segunda cadena, actualmente La 2.

 

Enantes de la llei que permitía la cesión de llicencies de televisión privaes, el Gobiernu estatal aprobó la creación de televisiones autonómiques, siendo la primera en desendolcase la EiTB vasca. Darréu siguieron-y la canal catalana (1983) y la gallega (1984), toes elles con programes na llingua llariega dafechu. D’esta forma, convirtiéronse nuna ferramienta básica pa la normalización del idioma vascu, catalán y gallegu.

Asturies nun contó con televisión autonómica, pese a la demanda importante qu’hebo por parte de la sociedá, hasta’l 2005. Nacía asina la Radiotelevisión del Principáu d’Asturies (RTPA), que nun comenzaría coles sos emisiones hasta un añu depués. A diferencia del restu de canales de territorios con llingua propia, la TPA –como se denomina– emplega na sos programación el castellanu dafechu, con namái dalgunos espacios n’asturianu pese a los importantes datos d’audencia qu’algamen les producciones en llingua asturiana.