La radio

27 Marzu, 2015
Asturies.com

Ún de los inventos más influyentes y destacaos del sieglu XX foi la radio. Atribuyida de manera xeneral la so invención al italianu Guglielmo Marconi, lo cierto ye que foron munchos los científicos que dieron pasos pal unvíu de señales d’audio al traviés d’ondes electromagnétiques.

El físicu escocés James Clerk Maxwell foi’l primeru que formuló, nel 1873, la teoría de les ondes electromagnétiques. Catorce años depués, l’alemán Heinrich Hertz descubrió les onde de radio y el serbiu Nikola Tesla, consideráu por munchos como’l verdaderu inventor de la radio, fixo la primer demostación de comunicación inalámbrica al travies d’ondes de radio nel 1894, rexistrando delles patentes al respeuto.

«Old radio» de Taken byfir0002 | flagstaffotos.com.auCanon 20D + Tamron 28-75mm f/2.8 - Trabajo propio. Disponible bajo la licencia GFDL 1.2 vía Wikimedia Commons - https://commons.wikimedia.org/wiki/File:Old_radio.jpg#/media/File:Old_radio.jpg

Antiguu receptor de radio

¿Sabíes qué…? El primer sistema de radio construyóse nel 1895. El so autor foi Marconi y nel 1901 consiguió unviar señes al otru llau del Atlánticu.

El valencianu Julio Cervera, que collaborara un tiempu con Marconi, consiguió tresmitir per primer vegada audio per ondes electromagnétiques nel 1902 ente Alacant y Eivissa. L’inxenieru y militar rexistró la patente n’España, Inglaterra, Alemaña y Bélxica.

Hasta 1920 nun s’entamaron les primeres emisiones de radio enfocaes a la información y al entretenimientu. Diéronse n’Estaos Xuníos y Arxentina, considerándose la primera una emisora de Detroit. Col pasu los años la radio foi asentándose, convirtiéndose nuna ferramienta básica pa la población occidental.

Estación y torre d'antena tresmisora de radio

¿Sabíes qué…? En conflictos armaos, como la Segunda Guerra Mundial, o en situaciones como la Posguerra española, la radio foi clave pa facer propaganda o informar de lo acontecío lloñe de les zones onde nun había llibertá de prensa.

Les primeres emisiones que se pudieron sentir per radio n’Asturies foi de Radio Ibérica, inaugurada nel 1923. Hasta la llegada de la televisión, nel 1956 nel Estáu, esti mediu de comunicación resultó’l más importante, llegando a xuntar a families enteres al rodiu del aparatu radiofónicu.

La única canal de radio en llingua asturiana dafechu ye Radio Sele, fundada nel 1986 n’Uviéu, qu’emitía pela FM hasta’l 2011, cuando’l Gobiernu estatal obligó a retirar les sos emisiones por nun contar con llicencia. Sicasí, continúa furrulando per Internet. D’esta forma, la radio pública RPA, creada nel 2006, ye la única que tien una programación regular n’asturianu, anque ésta ye enforma probe.