La pallabra música provién del griegu y vien a significar ‘l’arte de les muses’. Defínese como l’arte de combinar soníos de manera prestosa para l’oyíu combinándolos con silencios y utilizando los principios fundamentales de la melodía, l’harmonía y el ritmu. Tolos pueblos prauticaron música a lo llargo de la historia y l’asturianu cuenta con una riqueza perimportante nesti arte.
Considérase como canción asturiana a la tonada, estilu tradicional d’orixe popular que se suel cantar de manera individual, xeneralmente en compañía d’un gaiteru. Pese a que nos años primeros del sieglu pasáu vivió’l so momentu d’esplendor, entovía anguaño cuenta con munchu tirón y siguidores.
Marisa Valle Roso
¿Sabíes qué…? Anabel Santiago o los hermanos Marisa y Fernado Valle Roso son dalgunes de les voces moces de la tonada que se sumen a clásicos entovía n’activo como Diamantina Rodríguez, Mariluz Cristóbal Caunedo o José García ‘Che de Cabaños’. Has d’escuchalos, que de xuru te presten.
La gaita ye l’instrumentu de referencia n’Asturies, anque ta bastante estendíu per tol planeta. L’asturiana tien unes carauterístiques singulares y consta de les partes siguientes: el soplete, el punteru, el fueye, el roncón, el ronquín y los asientos.
Otros instrumentos utilizaos na música tradicional asturiana son el tambor, la gaita rabil, l’acordión, el panderu, la pandereta, el violín o la flauta.
El Gaiteru Libardón
¿Sabíes qué…? La figura del gaiteru tuvo mui presente n’Asturies nel sieglu XX, yá qu’animaba toles romeríes en compañía d’un tamboriteru. Anguaño, por mor del cambiu de los tiempos, los gaiteros suelen formase al rodiu de les bandes de gaites y axuntase nestes formaciones.
La mirada d’Asturies hacia los sos raigaños atlánticos que se dio na década de los 80 provocó la creación de delles Nueches Celtes y la proliferación de bandes que parten de la tradición musical de los pueblos con posu celta. Esta música, denominada folk, tomó como referentes grupos escoceses e irlandeses, y, utilizando instrumentos tradicionales, xeneró una corriente musical qu’entá anguaño tien muncha fuercia.
¿Qué grupos de folk conoces?
¿Qué diferencia hai entre una gaita asturiana y una gallega?
Marisa Valle Roso
El Gaiteru Libardón