La música
La pallabra música provién del griegu y vien a significar ‘l’arte de les muses’. Defínese como l’arte de combinar soníos de manera prestosa para l’oyíu combinándolos con silencios y utilizando los principios fundamentales de la melodía, l’harmonía y el ritmu. Tolos pueblos tuvieron dalgún tipu de manifestación musical a lo llargo de la historia, asina que ye dalgo común a toles sociedaes.
Yá na prehistoria’l soníu y la danza yera símbolu de vida pal home primitivu. Pa facer música utilizaben la so propia voz y dellos preseos qu’atopaben na naturaleza, como güesos o troncos. La música, poro, ye tan antigua como’l propiu home.
![Flauta d'orixe paleolíticu Flauta d'orixe paleolíticu](http://asturies.com/sites/default/files/musica_01.jpg)
Nel antiguu Exipto, en Mesopotamia y nel Oriente Llonxanu yá había conocimientos avanzaos de música, anque los primeros documentos musicales conservaos tiene el so orixe en Grecia. En tiempos de Roma, mentes, ganen pesu les representaciones teatrales acompañaes por música.
Na Edá Media la música tien calter relixosu –ente la que destaquen los cantos gregorianos– o profanu, cola presencia de trovadores y xuglares. Nesti tiempo, la monodia pierde terrén frente a la polifonía, esto ye, la combinación de soníos y melodíes distintas y simultánees.
El periodu de más esplendor de la música asocede tres el Renacimientu, cuando se desendolca n’Europa la güei nomada ‘música clásica’. Ésta percuerre los periodos del Barrocu, el Clasicismu y el Romanticismu, acueye’l nacimientu de la ópera y cuenta con músicos de la sonadía de Bach, Händel, Vivaldi, Mozart, Beethoven, Haydn o Wagner.
![Orquesta filarmónica de Dublín Orquesta filarmónica de Dublín](http://asturies.com/sites/default/files/musica_02.jpg)
- ¿Cuál ye’l to estilu de música favoritu? ¿Por qué?
- ¿Qué artista/grupu asturianu prautica esi estilu?
- ¿Sabríes dicir un instrumentu tradicional asturianu?
- ¿Quién dirixe una orquesta y onde se sitúa?