Gaspar Melchor de Xovellanos

Escritor, xurista y políticu ilustráu, Gaspar Melchor de Xovellanos ye consideráu como ún de los asturianos más destacaos a lo llargo de la historia. Foi ministru, representante d’Asturies na Xunta Central Suprema y trabayó a lo llargo de la so vida na prosperidá del país y na defensa de la so cultura, siendo tamién una figura reconocida a nivel estatal pol so enfotu en reformar les instituciones.

Nacíu en Xixón nel añu 1744 nuna familia noble non adinerada, principió na ciudá los sos estudios, en concreto de Lletres y Llatín. Nel 1757 treslladóse a Uviéu pa deprender Filosofía y, depués, a Ávila, onde fai estudios eclesiásticos, como deseaben los sos padres. Tres una etapa n’Alcalá, nel 1767 consigue plaza de maxistráu na Real Audiencia de Sevilla, ciudá onde residiría 11 años.
 
«Francisco de Goya y Lucientes - Gaspar Melchor de Jovellanos» de Francisco de Goya - [1]. Disponible bajo la licencia Dominio público vía Wikimedia Commons - https://commons.wikimedia.org/wiki/File:Francisco_de_Goya_y_Lucientes_-_Gaspar_Melchor_de_JovellGaspar Melchor de Xovellanos
¿Sabíes qué…? Xovellanos afitó los sos pensamientos ilustraos mientres la so estancia sevillana. Ésti yera un movimientu ideolóxicu y inteleutual que daba importancia a la razón p’algamar el progresu.

Nel 1778 consigue’l treslláu a Madrid, onde aumentaría’l so prestixu, llegando a ser miembru de la Real Academia de la Historia o de la Real Academia Española. Yera un momentu d’espansión nel Estáu del pensamientu ilustráu que predicaba Xovellanos, pero la Revolución Francesa nun tuvo una bona aceptación na corte borbónica y viose obligáu a tornar a Asturies nel 1790.

La so estancia n’Asturies sirvió a Xovellanos pa decatase de les necesidaes del país al traviés de numberosos viaxes pela nuesa xeografía. Asina vio les posibilidaes que l’estraición del carbón podía dar al nuesu territoriu y trabayó por acabar col aislamientu que vivía Asturies cola Meseta. Nel añu 1797 torna a Madrid pa ser ministru de Gracia y Xusticia con Manuel Godoy, cargu dende’l que trató  reformar la xusticia y amenorgar el poder de la Inquisición, pero nel que namái tuvo 9 meses.

 

«Museo Jovellanos» de Sitomon - Trabajo propio. Disponible bajo la licencia Dominio público vía Wikimedia Commons - https://commons.wikimedia.org/wiki/File:Museo_Jovellanos.JPG#/media/File:Museo_Jovellanos.JPG
Muséu Casa natal de Xovellanos
¿Sabíes qué…? L’ilustráu xixonés trató de crear una academia de la llingua asturiana pal estudiu del nuesu idioma, al que denominó bable, y ellaborar un diccionariu.

Foi mientres esta etapa siguiente, na que tornó a Xixón, onde tuvo hasta’l 1801, momentu nel que Godoy torna al poder y ordena detenelu por supuestamente introducir nel Estáu una copia del ‘Contrato Social’ de Rosseau. Apresáu nel castiellu de Bellver, en Palma de Mallorca, quedó lliberáu nel 1808 tres el motín d’Aranjuez, y representó a Asturies na Xunta Central depués de refugar la so entrada nel Gobiernu de José Bonaparte. Xovellanos morrería nel 1811, con 67 años, en Veiga de pulmonía, puertu nel que’l so barcu tuvo qu’atracar por una tormenta cuando l’ilustráu escapaba de Xixón rumbu a A Coruña tres un contraataque francés.

Na so vida, el xixonés escribió obres lliteraries, pero los sos trabayos más importantes foron ensayos sobre economía, política, filosofía o costumes. El ‘Informe sobre la ley agraria’, la ‘Memoria para el arreglo de la policía de espectáculos y diversiones públicas’, ‘Informes mineros’ y ‘Instrucción para la formación de un Diccionario bable’ son dalgunos d’ellos.

 

  • ¿Por qué ye importante Xovellanos?
  • ¿Por qué lu cataloguen d’ilustráu?
  • ¿Qué cargos destacaos ocupó a lo llargo de la so vida?
  • ¿Qué intención tenía pa cola llingua asturiana?

 

Pon n’orde cronolóxicu la estancia de Xovellanos nestos llugares:

Sevilla
 
Uviéu
 
Palma de Mallorca
 
Xixón
 
Madrid
 
Ávila
 
Veiga
 
Alcalá
 
5
2
7
1
6
3
8
4