El Rei Pelayo

Nun conocemos l’orixe concretu de Pelayo. Les cróniques albeldense y rotense falen d’él como un noble godu, mentes que’l testamentu d’Alfonso III vencéyalu col área central del país, ensin concretar el so llugar de nacencia. Lo cierto ye que cola so figura al mandu de les tropes asturianes consiguiría la victoria militar y daría niciu al Reinu d’Asturies.

 

Tampoco nun se conoz la fecha exauta na que tuvo llugar la batalla de Cuadonga y poco se sabe de los detalles de la llucha ente astures y musulmanes nel monte Auseva. Nella Pelayo, un noble cristianu de supuestu orixe visigodu que refugaba’l pagu de tributos a los musulmanes asentaos n’Asturies, enfrentó a les tropes musulmanes unviaes por Anbasa, valí d’Al-Andalud, y dirixíes por Alquama nuna zona montañosa cercana a Cangues d’Onís. Al paecer, yera’l segundu llevantamientu de Pelayo, que convenciera a los astures de la zona pa facer frente a los musulmanes depués de que se viese obligáu a colar de Xixón, onde gobernaba Munuza, que taba encapricháu na so hermana Ermesinda.

La crónica más cercana nel tiempu con respeuto a la batalla ye la musulmana, la d’Al-Maqqari, que se refier a Pelayo como un pollín xabaz. Nella señala que los árabes nun pararon d’atacalu hasta que los sos soldados morrieran de fame, quedando Pelayo en compañía de trenta homes y diez muyeres que s’alimentaben de miel. Sicasí, les condiciones de los musulmanes tampoco yeren bones y déxaronlos vivos diciendo “trenta pollinos xabaces, ¿qué dañu pueden facenos?”.

 

Pela so parte, la crónica albeldense, fechada alredor del 880, cifra l’éxercitu d’Alquama en 187.000 homes. Ésta cuenta cómo l’obispu Oppas, collaborador de los árabes, dirixóse a Pelayo, abellugáu na cueva, pa convecelu de que cediese énte los musulmaes, a lo que’l caudillu respondió refiriéndose a la fe cristiana, negándose a dexase someter a los paganos, lo que dio aniciu al ataque de les tropes musulmanes. La intercesión de la virxe, provocando un argayu, llevó a la muerte de munchos d’ellos. Similares son les d’Alfonso III, la rotense y la sebatiense. La primera señala que na batalla morrieren 124.000 musulmanes, a los qu’hai que sumar 63.000 aplastaos poles roques cayíes por mediación divina mentes escapaben. Otra manera, hai que destacar que la segunda apunta que Pelayo nun foi escoyíu como caudillu polos astures, sinón polos godos abellugaos n’Asturies.

 

Tres la victoria, Pelayo asentó la corte en Cangues d’Onís y comenzaría la construcción d’un reinu qu’en poco tiempu estendería enforma les sos llendes. La so muerte llegaría-y nel añu 737, recibiendo supultura na ilesia de Santa Eulalia, n’Abamia. El so fíu Favila sucederíalu nel tronu, gobernando dos años, siete meses y diez díes ente’l 737 y el 739. La crónica rotense rellata que falleció por mor del enfrentamientu con un osu.