El cine y la fotografía
La fotografía ye una técnica na qu’al traviés de procesos químicos somos quien a fixar una imaxen. Tamién ye considerada una disciplina artística. L’antecedente de la cámara fotográfica ye la cámara oscura, caxa zarrada con un pequeñu furacu pel qu’entraba la lluz espeyando los reflexos de los oxetos del exterior nuna de les paredes. Y anque hubo munchos precedentes dende la Edá Media del so usu pa fixar imáxenes de forma permanente, nun foi hasta 1826 cuando’l francés Nicéphore Niépce foi quién a fixar nun papel una imaxe. Necesitó 8 hores pa “sacar” la semeya y ye la primer foto que conservamos: ye la imaxe de los teyaos dende la ventana de la so casa.
Semeya de 1838 na qu’apaecen por primer vez persones ¿Vesles?¿Sabíes que…? La primer semeya tomada dende’l cielu foi en 1858 y foi obra del francés Tournachon. Sacóse dende un globu a 80 metros d’altura y ye una imaxe del pueblu de Petit-Becetre.
La primer técnica fotográfica propiamente dicha foi la del tamién francés Daguerre, que en 1839 meyoró la calidá de la imaxe y amenorgó considerablemente’l tiempu d’esposición necesariu. Esta técnica llamóse “daguerrotipu”. Colos años fueron meyorándose la técnica, y la empresa Kodak sacó en 1888 la cámara con carrete. Una técnica qu’hasta la llegada de les cámares dixitales en 1990 sería la más popular.
Durante tol sieglu XIX les semeyes yeren en blancu y negru. Hasta 1903 nun s’asoleyó una técnica que permitía sacales en color. Fueron los hermanos Lumière, que tendrían tamién gran importancia nel tema que vamos ver darréu: el cine.
Fotograma de la primer película de la historiaEl cine nun foi más que la evolución de la fotografía, Si podíemos tener semeyes ¿Por qué non conseguir imáxenes en movimientu? Y asina ñació, porque a fin de cuentes el cine nun ye otra cosa que grabar y proyectar una serie de semeyes en movimientu. Fueron los Lumière los primeros que grabaron imáxenes en movimientu gracies al so inventu: el cinematógrafu. Nesti casu grabaron escenes de la vida real: la salida d’unos obreros de la fábrica, el derribu d’una muria, la salida d’un barcu y la llegada del tren. Y proyectaron aquella primer película un 28 d’avientu de 1895 en París. Los espectadores asistieron ablucaos a aquel espectáculu, y cola llegada del tren varios apartáronse pensando que diba atropellalos.
Pocos años depués, en 1902, proyectábase la primer película de ficción. Yera obra de George Mèliés y titulábase “El viaxe a la Lluna”. A partir d’ehí el cine va dir desarrollándose. Primero les películes fueron mudes y en blancu y negru, pero yá en 1927 estrenóse la primer película sonora, “El cantor de jazz”. Y la primera en color pocos años más tarde, en 1935, llamada “La feria de la vanidad”.
- ¿Cuál ye l’antecedente de la cámara fotográfica?
- ¿Cómo se llama la primer técnica fotográfica?
- ¿Qué hermanos inventaron el cine?
- ¿Cuál ye’l nome de la primer película de ficción?