Por deporte entiéndese una actividá corporal que meyora la condición física o psíquica del que lo prautica. Pue tener calter competitivu o non y vien dándose dende l’Antigüedad. Al respeuto, el primer deporte de la historia pue considerase l’atletismu, yá que recueye los movimientos naturales del home: correr, caminar, saltar y llanzar oxetos.
Na época griega yá se rexistraba una diversidá amplia de deportes, dalgunos venceyaos a la cultura militar de la época na zona. Nesi contestu entamáronse per primer vegada los Xuegos Olímpicos (añu 776 a.C.), en concreto n’Olimpia, na que participaben representante de diferentes ciudaes estaos de la Grecia antigua. Les práutiques atlétiques, les competiciones de llucha y les carreres de carru yeren dalgunes de les modalidaes d’aquellos xuegos, anque la estrella del programa yera’l pentatlón, que constaba d’una carrera de velocidá, salto de llonxitú, llanzamientu de discu y xabalina, y llucha.
Bandera olímpica
¿Sabíes qué…? Mientres se disputaben los Xuegos Olímpicos –cada cuatro años– tenía llugar una tregua o paz olímpica pola que s’aparaben toles guerres cola fin de que los atletes pudieren treslladase a Olimpia pa competir.
Los Xuegos Olímpicos desendolcáronse hasta l’añu 393, cuando l’emperador romanu Teodosio I decidió suspendelos al catalogalos de paganos. Nun se volveríen a celebrar hasta’l 1896, dos años depués de que’l Barón Pierre de Coubertin fundara’l Comité Olímpicu Internacional (COI). La ciudá d’Atenas acoyó aquella primer edición de los Xuegos Olímpicos de la era moderna, na que participaron 241 atletes de 14 países en 43 eventos correspondientes a 9 deportes. Tres esta ésitosa edición, la segunda edición pasaría a celebrase en París, dao’l deséu del COI de que la sede fora itinerante.
En too esti tiempu, esta competición evolucionó de manera espectacular hasta convertise nel eventu deportivu de mayor trescendencia del planeta, col permisu del Mundial de Fútbol de la FIFA. Nes Olimpiaes últimes, les de Londres 2012, participaron 10.568 atletes de 204 países en 302 eventos correspondientes a 26 deportes.
Marqués de Pidal
¿Sabíes qué…? El primer medayista asturianu foi Pedro José Pidal, marqués de Villaviciosa, que se llevó la plata –segunda posición– na prueba de tiru al pichón nos xuegos de París 1900, anque dalgunes persones nun la consideren oficial al ser ésta una competición profesional remunerada nun tiempu nel que los Xuegos Olímpicos yeren namái p’aficionaos.
Nel sieglu XX llegó la profesionalización del deporte y la so conversión nun espectáculo de mases. El fútbol ye consideráu’l deporte rei por escelencia, con aficionaos en tolos puntos del planeta. Otres modalidaes d’ésitu son el baloncestu, el tenis y el ciclismu, amás del béisbol o’l cricket en zones concretes del mundu.
A finales del sieglu pasáu tamién llego la proliferación de la práutica deportiva ente’l ciudadanu mediu. Asina, fixéronse habituales los ximnasios nes ciudaes y la carrera continua o la bicicleta son modalidaes mui estendíes nos tiempos actuales.
¿Conoces dalgún medayista asturianu?
¿Qué deporte centra la mayor atención nos Xuegos Olímpicos?
¿Namái se celebren Xuegos Olímpicos en branu?
¿Cuál ye’l deporte olímpicu más prauticáu n’Asturies?
Enllaza a estos deportistes asturianos cola so modalidá deportiva:
Bandera olímpica
Marqués de Pidal