Centru d'Asturies

La fastera central d’Asturies comprende lo que ye la redolada d’Avilés y el triángulu que conforma con Uviéu y Xixón, amás de les dos cuenques mineres: la del Caudal y la del Nalón. Esta zona del país concentra la mayor cantidá de población, al sumar más de 800.000 del millón y poco d’habitantes que tien Asturies.

Nesta zona fálase asturianu central, variante que se tomó como referencia pa la normativización de la llingua al ser la más falada. Sicasí, l’Academia de la Llingua Asturiana respeta toles varientes.
Bandera d'UviéuBandera d'Uviéu
¿Sabíes qué…? Xixón ye la decimoquinta ciudá más poblada del Estáu, pero la zona central d’Asturies ocupa’l sétimu puestu de les grandes árees metropolitanes.

La industria ye’l gran motor de la economía del centru d’Asturies, con especial importancia pa la siderurxa y el carbón. El primer sector continúa teniendo vitalidá pese a la importante perda d’emplegos, mentes que’l segundu ta condenáu al desaniciu, con fecha yá de caducidá impuesta dende l’Estáu y la Xunión Europea: 2018.

El sector terciariu, sobre manera’l turismu, ye l’alternativa que se ta poniendo enriba la mesa pa salvar la mala situación de la industria. Pese a les posibilidaes que tien la fastera central nesi sen, tovía queda munchu trabayu por facer.

 

Bandera de XixónBandera de Xixón
¿Sabíes qué…? Xixón y Uviéu son les dos poblaciones más visitaes polos turistes nesta fastera.

Estes dos ciudaes precisamente son les poques que se salven del baxón poblacional que viven los conceyos asturianos, yá que munches persones deciden dexar les sos poblaciones d’orixe, sobre manera nes cuenques y nes otres dos fasteres del país, pa prebar fortuna nelles por mor de contar con mayores oportunidaes llaborales.

La fastera central d’Asturies ye la meyor comunicada, con autopistes y autovíes que la vertebren de norte a sur y d’este a oeste, siendo la más importantes y las más antigua la nomada ‘Y’ que xune Xixón, Uviéu y Avilés. Esta zona dispón d’enllaces ferroviarios y del únicu aeropuertu comercial del país, asitiáu en Santiago’l Monte (Castrillón).

 

  • ¿Cuánta xente vive na fastera central d’Asturies?
  • ¿Cuála ye la población con más habitantes?
  • Xunto a Xixón, ¿cuála ye la otra ciudá más turística?
  • ¿Ónde ta l’Aeropuertu Internacional d’Asturies?

 

Enllaza estes poblaciones de la fastera central col so municipiu:

Candás
 
L’Entregu
 
Uxo
 
La Camocha
 
Olloniego
 
Salinas
 
Lluanco
 
Llugo
 
La Felguera
 
Morea
 
Carreño
Samartín del Rei Aurelio
Mieres
Xixón
Uviéu
Castrillón
Gozón
Llanera
Llangréu
Ayer