Ayalgues Cámara Santa

La Cámara Santa trátase d’un edificio del sieglu IX que ta asitiáu dientro del conxuntu de la Santa Ilesia Basílica Catedral Metropolitana de San Salvador d’Uviéu, conocida popularmente como la Catedral d’Uviéu. Foi construyida pol monarca asturianu Alfonso II ‘El Castu’ (760-842) nel sieglu IX y tien un estilu prerrománicu.

Ta formada por dos capielles superpuestes: una inferior, llamada Cripta de Santa Leocadia, y otra superior, de nome Capiella de San Miguel. Ésta última sufrió una reforma nel sieglu XII, sustituyendo la bóveda de madera por otra de cañón. La reconstrucción última del edificiu fíxose’l sieglu pasáu, tres los acontecimientos revolucionarios d’ochobre del 1934.
 
«Cruz de los Ángeles de Oviedo» de Sitomon - Trabajo propio. Disponible bajo la licencia Dominio público vía Wikimedia Commons - https://commons.wikimedia.org/wiki/File:Cruz_de_los_%C3%81ngeles_de_Oviedo.JPG#/media/File:Cruz_de_los_%C3%81ngeles_de_Oviedo.Cruz de los Ánxeles d'Uviéu
¿Sabíes qué…? Na Cámara Santa guárdense dende los sos primeros años les ayalgues más valioses y importantes d’Asturies: la Cruz de la Victoria, la Cruz de los Ánxeles, la Caxa de les Ágates y l’Arca Santa.

La Cruz de la Victoria ye una reliquia donada por Alfonso III nel 908 a la ilesia de San Salvador d’Uviéu, en concreto una cruz llatina de madera carbayu recubierta años por oru y piedres precioses. La lleenda diz que Pelayo utilizó esta cruz de madera como estandarte na batalla de Cuadonga, guardada en Cangues d’Onís y llueu engalanada en tiempos d’Alfonso III. Anguaño ye considerada como símbolu d’Asturies, como pues ver na nuesa bandera y escudu.

Símbolu d’Uviéu –apaez nel escudu de la ciudá–, mientres, ye la Cruz de los Ánxeles. Ésta tien forma de cruz griega, construyóse nel sieglu IX y Alfonso II donóla a San Salvador nel 808. Llama l’atención la so orixinalidá pa la época, polo que s’atribúi la so autoría a artistes de fuera qu’acudieren al Reinu d’Asturies, posiblemente bizantinos o lombardos.

 

«Cripta de santa Leocadia» de Sitomon - Trabajo propio. Disponible bajo la licencia Dominio público vía Wikimedia Commons - https://commons.wikimedia.org/wiki/File:Cripta_de_santa_Leocadia.JPG#/media/File:Cripta_de_santa_Leocadia.JPGCripta de santa Leocadia
¿Sabíes qué…? La UNESCO declaró nel 1998 a la Cámara Santa  como Patrimoniu de la Humanidá  dientro de los ‘Monumentos d’Uviéu y del Reinu d’Asturies’.

La Caxa de les Ágates  ye la más moderna de les xoyes prerromániques de la Cámara Santa. Donóla Fruela II a San Salvador nel añu 910 y trátase d’un cofre de base rectangular cola parte superior en forma de pirámide truncada. Construyida en madera de peral y engalanada, el so destín yera guardar reliquies.

Completa estes cuatro ayalgues l’Arca Santa, que nun ye prerrománica, sinón que ye del sieglu XI. Ye una caxa de madera de cedru con chapa de plata y sobredorada heredera d’otra similar que, según cuenta la lleenda, llegó a Uviéu dende Xerusalén a lo llargo de cientos d’años con delles reliquies nel so interior, ente elles el Santa Sudariu, pañuelu de llinu que se cree cubrió’l rostru de Xesús de Nazaret na so muerte.

 

 

  • ¿De qué época y estilu artísticu son la mayor parte de les ayalgues de la Cámara Santa?
  • ¿Cómo ye una cruz llatina?
  • ¿Qué colores y símbolos lleva la bandera d’Asturies?
  • ¿Contra quién lluchó Pelayo en Cuadonga?
Enllaza estes construcciones prerromániques col conceyu nel que ta asitiaes:

Santa María del Naraco
 
Santa Cristina
 
San Xuan
 
Santa Cruz
 
San Salvador de Valdediós
 
San Pedro de Nora
 
Santiago de Gobiendes
 
Uviéu
Ḷḷena
Pravia
Cangues
Villaviciosa
Les Regueres
Colunga