Fauna

5 Xunu, 2014
Asturies.com

La fauna ye’l conxuntu de los animales propios d’un país o d’una zona. N’Asturies habiten especies que tamién viven en territorios cercanos, pero cuenta con delles races autóctones que son típiques d’equí y que nun hai n’otros llugares.

Por mor de los diferentes territorios qu’hai n’Asturies, que van dende la mariña a les zones de monte, contamos con una variedá grande d’especies. Quiciabes los más famosos o carauterísticos son l’osu pardu, el gallu montés, el llobu, la llondra, el venáu o la víbora.

Asturcón

¿Sabíes qué…? L’osu pardu ye un animal en peligru de desaniciu pese a la recuperación de población que ta viviendo nos años últimos. Esti mamíferu vive en delles zones de la Cordelera Cantábrica y ye omnívoru.

N’Asturies hai siete races autóctones, esto ye, propies del llugar que namái se dan equí. Éstes son l’asturcón, el gochu asturcelta, la pita pinta, la cabra bermeya, la oveya xalda, la vaca casina y la vaca asturiana de los valles.

Oveyes xaldes

¿Sabíes qué…? Estes races foron sustituyíes por otres más productives a lo llargo del sieglu XX, hasta llevales al borde del desaniciu. L’esfuerciu de ganadores y criadores permiten la recuperación d’estes especies, mui valoraes anguaño.

Bañáu pol mar Cantábricu, onde desemboquen munchos ríos, Asturies ye un país con una bayura importante de pexes, mariscos y otres especies marines. Asina, nos ríos asturianos ye posible atopar salmones, anguiles o truches, y nel mar pixines, reis, xardes, parroches, chopes, xáragos, merluces o sardines. De xuru que tamién te suenen otros animales como los muxones, les llámpares, les ñocles, los bugres, los centollos o los oricios.

No que respeuta a les aves, tamién podemos atopar munches especies, como xilgueros, cuquiellos, curuxes, raitanes, andolines o pegues, asina como delles rapaces, como águiles o ferres. Ente éstes últimes, destaca la introducción recién de dellos individuos de frangüesos procedentes de los Pirineos, una especie que se desaniciara n’Asturies hai tiempu.