Escolinos de Cangas van participar nel XII Concursu de Cuentos n’Asturianu Otilio Álvarez Rodríguez

El Serviciu de Normalización Ḷḷingüística de Cangas del Narcea convoca’l XII Concursu de Cuentos n’Asturianu Otilio Álvarez Rodríguez. Nel mesmu pueden participar escolines y escolinos de terceru a sestu de Primaria de colexos del conceyu, con plazu pa presentar trabayos, ún per persona, hasta’l 10 de mayu.

La temática de los cuentos ye llibre, cola posibilidá d’emplegar la variante occidental, la propia de Cangas, o’l estándar normativu. La estención mínima ye d’una fueya, y la máxima de cinco, en DIN-A4, cola posibilidá de presentalos manuscritos.

Un xuráu formáu por José María Álvarez Carro, conceyal de Cultura; Mónica Rodríguez Riesgo, responsable del SNL; Rosa Caballero, téunica de la Oficina d’Información a la Mocedá; Elena Martínez Martínez, téunica del Centru de Dinamización Tecnolóxica; y Noelia Rodríguez Menéndez, coordinadora del Aria de Cultura, va escoyer a los meyores testos con un valir lliterariu. Los ganadores van recibir un llote de llibros y material escolar nuna ceremonia con motivu de la celebración de la Sumana de las Ḷḷetras Asturianas.

Na semeya, IV Xunta d'Escolinas y Escolinos cona Ḷḷingua nel Teatru Toreno, celebrada na pasada Sumana de las Ḷḷetras Asturianas, onde s'entregaron los premios de los ganadores del anterior concursu de cuentos.