Escolinos d’asturianu del IES númberu 5 d’Avilés estrenen un curtiumetraxe pel Día Internacional de la Llingua Materna

Iker Corujedo, Nel Llope, Marcos González Redondo y Izán Álvarez Caicoya, grupu de Llingua Asturiana IES 5 Avilés

‘Veníi a xugar conmigo’ ye’l nome del curtiumetraxe que los escolinos del grupu de Llingua Asturiana de primeru de la ESO del IES númberu 5 d’Avilés grabaron pa estrenalu esti martes, Día Internacional de la Llingua Materna. Terror y aventura conformen esta cinta n’asturianu.

Los alumnos Izan Álvarez Caicoya, Íker Corujedo, Marcos González Redondo y Nel Llope actúen nel curtiu y encargáronse del guión del mesmu col sofitu del so maestru, Inaciu Galán, que tamién participa faciendo’l papel de profesor. L’aición desendolcáse dafechu nel centru, onde los trés protagonistes reciben una visita inesperada nel primer día de clase tres les vacaciones de branu.

La estrena de ‘Veníi a xugar conmigo’ fíxose güei, coincidiendo col Día Internacional de la Llingua Materna, y va proyeutase nes clases del institutu a lo llargo d’esta selmana. Al igual que tolos escolinos y escolines del país, los alumnos del centru avilesín lleeron güei un ‘Manifiestu pola llingua materna’ mientres el recréu, actu que, al igual que’l curtiumetraxe, va difundise peles redes sociales.