El festival d’artes escéniques ‘Escenines pa la Reciella’ ufre cuatro espectáculos esta Navidá

El II ‘Escenines pa la Reciella’ principia esti llunes col cuentacuentos ‘Coses de neños’ que protagoniza Olga Cuervo. Ésta va ser la primer de les cuatro sesiones que ‘Reciella. Families pol Asturianu’ entama estes Navidaes nel salón d’actos del xixonés Colexu Públicu Xovellanos.

Toles actividaes van desendolcase a les 19 hores y pretenden ser una amuesa de los espectáculos infantiles más destacaos que se tán faciendo anguaño n’Asturies na nuesa llingua: dos cuentacuentos, un teatru de solombres acompañáu de música y una obra de teatru en forma monólogu. Nel primeru, el d’esta tarde, los neños y neñes van poder disfrutar de los cuentos más populares de Cuervo, mentes que’l vienres el turnu va ser pa El Turnebís del Tribilín y la so obra de teatru de solombres ‘El cuélebre de San Llorienzo y otres histories’. El ciclu va continuar el martes 30, colos ‘Ecolocuentos’ de Carlos Alba ‘Cellero’, pa depués poner el ramu’l vienres 2 de xineru col espectáculu ‘Árbol’ de la Compañía Higiénico Papel.

Reciella, premiada recién col Pegollu de los XXX Premios Andrés Solar pola so llabor escelente p’afitar la tresmisión xeneracional del asturianu, pretende con esta iniciativa que “los neños asturfalantes, asina como los que tienen interés y curiosidá por aprender l'idioma, tengan la oportunidá d'asistir a actividaes qu'utilicen la llingua asturiana con normalidá fuera del ámbitu escolar”. Asina, ufren estes cuatro sesiones que destaquen pol rexistru llingüísticu seriu y correutu de tolos artistes y compañíes, dalgo mui importante nel procesu de formación de los neños y neñes. ‘Escenines pa la Reciella’ cuenta col sofitu económicu del Conceyu de Xixón y de Caxa Rural.