Enriqueta González Rubín

Nacida en Santianes del Agua (Ribeseya) nel añu 1832, Enriqueta González Rubín ye una persona clave na lliteratura asturiana. Del so puñu nació la primer novela conocida en llingua asturiana: ‘Viaxe del Tíu Pacho el Sordu a Uviedo’, asoleyada nel añu 1875.

Poco se conoz de la vida de González Rubín; desconocemos inclusive la fecha de la so muerte. Foi una muyer de bona familia que tuvo un fíu de soltera y qu’exerció de maestra. Nunos tiempos nos que les muyeres nun teníen munches facilidaes nel día a día, inclusive pa escribir, la rioseyana pudo espublizar la so creación, principalmente en periódicos de la época como ‘El Faro Asturiano’, algamando una popularidá importante.


Enriqueta González Rubín
¿Sabíes qué…? Les sos collaboraciones periodístiques roblábales con alcuños pa nun dar a conocer la so identidá. Solía emplegar ‘La Gallina Vieja’ y ‘La Cantora del Sella’.

Dos de diches collaboraciones que conocemos de l’autora son ‘Una boda por amor’ y ‘Un Indianu como hay pocos’, recoyíes por Protasio González Solís en ‘Memorias asturianas’ (1890). Cien años más tarde, nel 1992, l’Academia de la Llingua Asturiana dedicaría-y un volume tituláu ‘Collaboraciones periodístiques’, primer llibru que s’espublizaría sobre González Rubín.

Amás de ‘Viaxe del Tíu Pacho el Sordu a Uviedo’, conozse que, al menos, González Rubín escribiera otra novela en ‘El Faro Asturiano’, pero nun nos llegó nada d’ella nin d’otres posibles creaciones de la escritora. Por fortuna, sí pudimos conocer la que ye primer novela conocida escrita en llingua asturiana, ‘Viaxe del Tíu Pacho el Sordu a Uviedo’, emprentada n’Uviéu por Eduardo Uría Rea nel 1875.


Facsímil de la edición de 1875 del llibru d´Enriqueta González Rubín (Ed. Trabe).
¿Sabíes qué…? Nel añu 2008 foi cuando se recuperó ‘Viaxe del Tíu Pacho el Sordu a Uviedo’. Al añu siguiente Trabe editaríala n’edición facsimil y el Gobiernu dedicaría a la escritora la Selmana de les Lletres Asturianes.

133 años depués de la so espublización, el conservador municipal del patrimoniu de Llanes, José Antonio Anca, descubría esta novela nun caserón de Llanes. L’afayu permitiónos saber que consta d’un total de venticuatro páxines n’octavu con un argumentu cenciellu: el viaxe del personaxe principal a Uviéu pa llevar un salmón a una persona de la que tien unes señes vagues.

Asina, Pacho conoz dellos llugares de la ciudá y afronta delles situaciones hasta dar cola persona que buscaba, pa tornar el día siguiente pa Ribeseya. El rellatu permite a González Rubín tratar sobre los uvieínos y facer una crítica de la política y la economía de la época.

  • ¿Por qué ye tan importante Enriqueta González Rubín?
  • ¿Qué sabes de la dómina na que vivió l’autora Santianes del Agua?
  • ¿Qué otres escritores femenines en llingua asturiana conoces?
  • ¿Sabríes dicime’l nome d’otres noveles asturianes?

 

El tíu Pacho viaxó hasta Uviéu. Pon n’orde estos llugares según el trayeutu que rellata’l llibru:

La Pola Siero
 
El Berrón
 
Ribeseya
 
Centru d’Uviéu
 
La Tenderina
 
Noreña
 
2
4
1
6
5
3