El xuegu de les pareyes d'Acuto aporta agora en gallego-asturiano

El Xogo das Parexas

El 'Xogo das Parexas', que yá tenía versión n'asturianu y gallegu, sal a la venta a 6 euros. Ésti ye ún de los munchos xuegos que ta asoleyando Acuto Xuegos pa que la reciella xuegue na so llingua materna.

La empresa familiar sigue medrando y agora apuesta tamién pol gallego-asturiano. Tres el gran ésitu del 'Xuegu de les Pareyes', escosada anguaño tres la so distribución a los puntos de venta colos que trabaya esta empresa familiar, y completar una campaña de mecenalgu popular na rede p'asoleyar 'O Xogo das Parellas', aporta agora la versión d'esti divertimentu educativu na llingua del occidente del país.

"Trátase d'un xuegu de 18 cartes pa trabayar vocabulariu de coses y oxetos cercanos al día a día de los neños y neñes y que val, amás de pa deprender vocabulariu, pa que seyan conscientes de que tán xugando nel idioma y asina lo normalicen na so vida", espliquen dende Acuto Xuegos. Xuguetes, foya, llúa, el arcu la veya, xelao o llapiceiro son dalgunes de pallabres, acompañaes con un debuxu, que los participantes han de tratar d'empareyar.

El preciu d'esti divertimentu educativu ye de 6 euros y, de momento, ta la venta namái pela rede.