¿Qué ye’l Sistema Solar? Ye’l sistema planetariu nel que s’alcuentra’l nuesu planeta, la Tierra. Nél, una serie d’oxetos astronómicos xiren n’órbita alrededor d’una estrella, el Sol, por efectu de la gravedá. El Sistema Solar ta dientro d’una galaxia, que ye la Vía Lláctea.
Nel Sistema Solar, aparte del Sol, hai ocho planetes. Son n’orden del más cercanu a más llonxanu del Sol: Mercuriu, Venus, Tierra, Marte, Xúpiter, Saturnu, Uranu y Neptunu. El más pequeñu ye Mercuriu, y al ser el más averáu al sol alcanza una temperatura de 350º. Ye tres veces menor que la Tierra y pa que compares, ye namás un poquitín más grande que la Lluna. Pol contrariu, el más grande ye Xúpiter. Ye tan grande que la Tierra cabría 1.300 veces nél.
Dibuxu del Sistema Solar
¿Sabíes que…? De xemes en cuando produzse un eclipse de Sol, que ye cuando la Lluna ponse enmediu del Sol y la Tierra, polo que’l Sol desapaez tapáu pola Lluna durante unos segundos. El próximu gran eclipse que podrá vese n’Asturies ta previstu pal 12 d’agostu de 2016.
¿Y si Mercuriu ye onde mas calor fai, en cual ye onde hai más friu? Pues ye en Neptunu, porque ye’l que ta más lloñe de la tierra y recibe mil veces menos lluz del Sol que la Tierra, polo que la so temperatura ye de -212º.
Pero nun solo hai grandes planetes y una estrella. Hai una serie de planetes llamaos enanos, como Plutón. Y tamién algunos planetes tienen lo que se llama “satélites”, que son como pequeños planetes que xiren alrededor d’un gran planeta. Menos Mercuriu y Venus toos tienen polo menos ún, como la Tierra, que tien la Lluna. Otros tienen munchos, como Saturnu, que tien 62 o Xúpìter, que tien 67.
Un astronauta
¿Sabíes que…? El Ser Humanu pisó la Lluna por primer vez el 21 de xunetu de 1969. Foi l’estadounidense Neil Armstrong, que nesi momentu pronunció la famosa frase “ye un pequeñu pasu pal home, pero un gran saltu pa la humanidá”.
L’estudiu del Sistema Solar y del Universu en xeneral llámase astronomía. Fueron grandes astrónomos el griegu Claudio Ptolomeo (100-170), autor del llibru más importante sobre los planetes de l’Antigüedá, el polacu Nicolás Copérnico (1473-1543), que descubrió que ye la Tierra la que xira alredor del Sol y non al revés, como se creía hasta esi momentu y l’italianu Galileo (1564-1642), que defendió la teoría de Copérnico y meyoró muncho’l telescopiu, instrumentu pa mirar los planetes.
¿Qué ye’l Sistema Solar?
¿Cuántos planetes tien?
¿Qué ye l’astronomía? ¿Sabes el nome d’algún astrónomu?
¿En qué consiste un eclipse?
Pon los planetes nel orde del mas cercanu al mas lloñe al Sol.
Dibuxu del Sistema Solar
Un astronauta