El Museo Taller de Títeres celebra una xornada especial esti domingu por mor del Antroxu
Esti domingu’l Museo Taller de Títeres va vivir una xornada especial por mor del Antroxu. Los visitantes van poder ver les mázcares de coleición del recintu, amás de recibir a un sidru procedente de Valdesoto.
Estes mázcares, que salen esti día del almacén del muséu, son de cultures diferentes y usábense en rituales, dances o teatru. Una ocasión perbona pa conocer esti recintu asitiáu en La Cabaña (Samartino, Siero) que nació por iniciativa de Joaquín Hernández, direutor de la compañía de títeres Tragaluz y del Taller del Sol pa mostrar “el mundu del arte de los títeres al traviés de la esposición de títeres y oxetos de tol mundu, y tamién el procesu creativu de los títeres dende la cotidianidá del trabayu d’un taller artesanu”, según esplica na web.
La visita guiada al museú nesta xornada especial va principiar a les 17.30 hores y tien un preciu de 2,5 euros. Pa formalizar les reserves la direición pon a disposición dos númberos de teléfonu, el 985.72.42.34 y 686.125.880, ya qu'hai un tope de places.