El final de la triloxía de Fontenebrosa lleva’l María Xosefa Canellada

El final de la triloxía de Fontenebrosa lleva’l María Xosefa Canellada

Vicente García Oliva resultó ganador del VIII Premiu María Xosefa Canellada de lliteratura infantil y xuvenil con ‘Fontenebrosa III: el final’. Ye la segunda vegada que consigue ún de los Premios Lliterarios, tres algamar el Máximo Fuertes Acevedo nel 2010.

La Casa la Cultura de Santoloya (Cabranes) acoyó la reunión del xuráu del gallardón –valoráu en 3.000 euros–, que tuvo conformáu polos escritores y especialistes en lliteratura infantil y xuvenil Lourdes Álvarez García, María Teresa González, José Luis Remis y María Xosé Rodríguez; amás del alcalde de Cabranes, Gerardo Fabián, y Alonso Zamora, fíu de Canellada, baxo la presidencia del direutor xeneral de Planificación Llingüística y Normalización, Fernando Padilla. Ente los ochos trabayos presentaos, los espertos decidieron dar el premiu por unanimidá al testu ‘Fontenebrosa III: el final’, presentáu baxo’l nomatu de ‘Ermesinda’, por “l'habilidá cola que se construye un universu míticu a partir del ritmu narrativu y la caracterización de los personaxes”.

L’autor de la obra yera García Oliva, escritor de gran trayeutoria y responsable de ‘Trabayu de campu’, ún de los trés blogues recomendaos por Asturies.com. Ésti ye’l primer María Xosefa Canellada pal académicu de númberu de l’Academia de la Llingua Asturiana, destacáu autor de lliteratura fantástica destinada a xente mozo, anque enantes yá llevara otru de los Premios Lliterarios que concede la Conseyería d’Educación y Cultura, en concreto un Máximo Fuertes Acevedo d’ensayu. Foi nel 2010 con ‘El síndrome de Sherezade’. Nel so palmarés tamién destaca un Premiu Timón p’autores n’asturianu y gallego-asturianu, el correspondiente a 2011, qu’entrega l’Asociación Cultural L’Arribada como reconocimientu a toda una carrera lliteraria.

Con ‘Fontenebrosa III: el final’, el xixonés da por fináu un ciclu de trés histories qu’entamó nel 1984 con ‘Fontenebrosa: El reinu de los silentes’, considerada la primer novela xuvenil en llingua asturiana, que yá va pola tercer edición. Nel 2011 llegó la segunda parte, ‘Fontenebrosa II: la rebelión de los homosaurios’.

Esti ye'l segundu de los cinco Premios Lliterarios 2015 que se falla. El pasáu día 13 diose a conocer que'l ganador del VII Premiu Alfonso Iglesias de cómic foi Ruma Barbero por 'El viaxe a la lluz'.