El Fierro Botas a la Meyor Idea Normalizadora ábrese a institutos de tol país

'Estaciones' del IES Númberu 1 III Fierro Botas a la Meyor Idea Normalizadora

La Conceyalía d’Educación y Cultura de Xixón decidió abrir el IV Premiu Fierro Botas a la Meyor Idea Normalizadora a estudiantes de Secundaria de tol país. Esti gallardón dedicáu al xesuíta fináu nel 2002 nun accidente de tráficu en Rusia sustituyó nel 2017 al d’estudios d’investigación en llingua asturiana o gallego-asturiano.

El Fierro Botas sufre un cambiu nuevu, nesta ocasión orientáu a abrir el gallardón a toda Asturies. Dende hai 3 años esti gallardón tien l’envís de favorecer el protagonismu nel procesu de normalización llingüística de los estudiantes de Secundaria de Xixón de l’asignatura de Llingua Asturiana y Lliteratura, incoporando tamién agora a los d’otros conceyos.

Esti premiu recompensa al meyor diseñu d’una campaña normalizadora que desenvuelva una iniciativa orixinal col oxetivu de favorecer l’usu y la visibilidá del asturianu, en principio en Xixón, pero apicable pa toda Asturies. El proyeutu ha de ser factible, con un tope de 3 por institutu.

El 30 d’abril ye la fecha llende pa presentalos y el centru ganador va recibir una pizarra dixital pa l’aula de Llingua Asturiana y Lliteratura, amás de la posibilidá de ver fechu en realidá la so idea normalizadora. El fallu del xuráu va producise nel mes de mayu.

Estudios importantes

El gallardón creáu en memoria de Federico Gonz ález-Fierro Botas nació pa recordar la memoria d’esti cura fundador del Coleutivu Manuel Fernández de Castro, tán venceyáu a la cultura rusa, lo que lu llevó a tornar al asturianu a Pushkin. Precisamente en Rusia, en Vladivostok, perdió la vida nel 2002 nun accidente de tráficu.

El gallardón que Xixón creó nel 2007 col so nome nació nun primer momentu pa estudios d’investigación en llingua asturiana o gallego-asturiano sobre la cultura rusa o eslava, la memoria social y coleutiva de los pueblos rusu y asturianu, o la memoria social y coleutiva de Xixón. Llegó a sumar nueve ediciones que dexaron trabayos de repercusión como ‘L’espeyu onde miranos: televisiones de proximidá n’europa Occidental y procesos de recuperación identitaria’, de Damián Barreiro, ‘La botella de Xixón. Oríxenes y desendolcu hestóricu de la botella de sidra d'Asturies'; d'Inaciu Hevia Llavona; 'Del romanticismu al rexonalismu: escritores carlistes na lliteratura asturiana', de Javier Cubero; o 'Mitoloxía sobre los santos n'Asturies. Raigaños paganos del cristianismu', d’Alberto Álvarez Peña, ente otros.

Na semeya, proyeutu 'Estaciones', del IES Númberu 1 de Xixón, ganador de la edición pasada del Fierro Botas.