El cuentacuentos musical con marionetes ‘El viaxe d’Irina’ protagoniza La Reciella de la Factoría

Los viaxes de Candela y d'Irina

El viaxe d'Irina escritu pola francesa allugada en Salinas Dominique Vernay ye treslladada a los escenarios por Olga Cuervo y David Varela. L’actriz y el músicu convierten esta historia nun cuentacuentos musical nesta actividá de La Reciella de la Factoría.

Irina trátase d’una matriuska, la tradicional y popular muñeca rusa, que sal del bandullu de les sos collacies pa dir de viaxe. Una aventura que va tar acompañada por música en direuto conformando un espectáculu prestosu con marionetes pa neñes y neños de 3 a 10 años, y acompañantes.

‘El viaxe d’Irina’ ye mañana la tercer propuesta de La Reciella de la Factoría pa esti semestre, actividá entamada pola Estaya de la Llingua d’Avilés y ‘Reciella. Families pol Asturianu’ nel Espaciu Escénicu de la Factoría Cultura. Toles funciones son de baldre y comiencen a les 19 hores, momentu nel que se zarren les puertes, impidiendo l’accesu a la sala cola función empezada.

Na semeya, ilustración de María Montes pa la obra 'Los viaxes de Candela y d'Irina' de Vernay.