El CP Felechosa comienza la so xira teatral cola obra ‘P’allá del Más-Allá’

CP Felechosa ‘P’allá del Más-Allá’

Los escolinos de quintu y sestu de Primaria del Colexu Públicu Felechosa, baxo la direición de la maestra Laura Prieto, comienza esti vienres la xira teatral con ‘P’allá del Más-Allá’. La obra recibió’l tercer premiu del VI Certame de Teatru Escolar en Llingua Asturiana y Gallego-asturiano, y el de meyor actriz, a Nerea Megido.

‘P’allá del Más-Allá’ ye una divertida comedia que cuenta la historia d’Adelina y la so familia y de cómo la so vida camuda dafechu cuando a la güela-y toques millones na Llotería de Navidá. Con perres n’abundancia, dedíquense a la bona vida mentantu que Gusti, la so vecina de puerta de tola vida, nun ye pa con ello.

La vida d’Adelina y la so familia pega un revés cuando, un día cualisquier, recibe una llamada avisándolos de que la güela desapaeció, y enriba sólo ella sabía ónde taben les perres. Adelina tará dispuesta a emplegar tolos medios p’atopar a so ma y les perres, inclusive a contautar coles fuercies escures del más allá.

Cuarta xira

Esta obra, que se representó’l xueves pasáu nel marcu de la XL Selmana de les Lletres Asturianes na gala d’entrega de premios del VI Certame de Teatru Escolar en Llingua Asturiana y Gallego-asturiano celebrada nel avilesín Teatru Palacio Valdés, foi distinguida col tercer premiu de la so categoría, amás del gallardón a la meyor actiz, que foi pa Nerea Megido. Agora, estes escolines y escolinos van comenzar una pequeña xira pa llevar esta representación a dellos llugares, no que va ser la cuarta qu’entama’l CP Felechosa per toda Asturies.

La primera va ser mañana, al meudía, nel Teatru Cine Carmen de Morea, una función destinada a toles escueles del valle d’Ayer. Nel mesmu llugar, el xueves viniente a les 20 hores, van repetila a tolos públicos.

La xira va siguir el martes 28 nel Auditoriu Teodoro Cuesta de Mieres, a les 19.30 hores, dientro de IV Gala de Teatru Escolar, na que va participar tamién el Grupu de Teatru del CP Returbiu. Yá en xunu, ‘P’allá del Más-Allá’ va aportar el vienres 7 a Caborana (19.30 hores, Xunta d’Iniciatives) y el llunes 17 a Felechosa (11.30 hores, salón d’actos de la Residencia del Montepío).