El CP Evaristo Valle gana’l VIII Concursu Ruempi la Mollera
La Oficina de Normalización Llingüística de Xixón falló esti xueves el VIII Concursu Ruempi la Mollera, nel que participaron 150 alumnos de quintu y sestu de Primaria d’ochos colexos de la ciudá. El centru ganador resultó l’Evaristo Valle.
El Ruempi la Mollera ye un concursu prestosu dirixíu a escolinos y escolines de Llingua Asturiana que consiste en trés entruges sobre la ciudá que se van dando a lo llargo del cursu. Los participantes han de dar una respuesta a les preguntes tres un procesu d’investigación y presentar amás propuestes alredor de la mesma, qu’esti añu foron dende una maqueta a un códigu QR, ente otres iniciatives. Les entrugues d’esta edición foron les siguientes:
1. El 6 de marzu de 2013 cumpliéronse los 75 años de la muerte d'esti polifacéticu autor xixonés, nomáu de recién Quiosqueru Mayor por cuenta d'una "farola" y que nos dexó un teatral regalín d'aldea. ¿Sabéis quién ye? Pachín de Melás
2. Lo que de mano entamó como ‘La Begoñesa’, terminó dando nome a un barriu de Xixón col apellíu del fundador d’una fábrica. ¿Sabéis de qué falamos? Laviada
3. Igual nun ye la más grande, pero sí la Mayor de Xixón. De xuru que la pasiasti bien de veces. Si nun dan con ello, pues preguntar por Coello. ¿De qué falamos? La Plaza Mayor
El Colexu Públicu Evaristo Valle resultó ganador d’esta edición del concursu, siguíu del Santa Olaya y del Lloréu, polo que recibió llibros n’asturianu pa la so biliblioteca, amás de detalles pa los alumnos y alumnes. Tamién participaron el Cervantes, el Xovellanos, el San Lorenzo, el Federico García Lorca y el Noega, que recibieron un diploma nun actu celebráu esta mañana nel Centru de Cultura Antiguu Institutu que tuvo presentáu y amenizáu por Antón Caamaño y otros dos actores de Producciones Nun Tris que propunxeron xuegos a los presentes. Carlos Rubiera, conceyal d’Educación, Cultura, Xuventú y Fiestes, encargóse d’entregar los premios y diplomes, y emponderó l’interés amosáu polos estudiantes “sobre la nuesa historia y les nueses tradiciones”. D’igual forma, destacó “la falta de complexos” hacia la llingua asturiana de los pequeños que pudieren tener les xeneraciones anteriores.
Na semeya, Rubiera xunto a los escolinos y escolines del Evaristo Valle que llevaron el concursu.