El cantar del VIII Día de la Reciella yá tien videoclip
![Videoclip 'L'asturianu sal con nós' VIII Día de la Reciella Videoclip 'L'asturianu sal con nós' VIII Día de la Reciella](https://asturies.com/sites/default/files/videoclip_lasturianu_sal_con_nos_viii_dia_de_la_reciella.png)
‘L’asturianu sal con nós’, el cantar qu’interpreta Xaime Martínez cola so banda La Familia Tradicional compuestu pal VIII Día de la Reciella, yá cuenta con un prestosu videoclip con protagonismu infantil grabáu en Cimavilla. Esta xornada festiva, programada pal sábadu nel Museú del Pueblu d’Asturies, incorpora’l valtu a les sos actividaes.
Pablo A. Quiroga y Juan Tizón encargáronse de la realización del videoclip de ‘L’asturianu sal con nós’, nel que collaboró tamién Pablo Casanueva. Nél apaez Martínez, autor d’igual forma de la lletra xunto a Estela Álvarez Blanco, y imáxenes de neñes y neños baillandu y xugando en dellos allugamientos del barriu altu de Xixón.
La pieza inclúi tamién el testu del cantar, cola fin de que se pueda siguir n’actividaes escolares en formatu karaoke. Los temes fechos por 'Reciella. Families pol Asturianu' pa promocionar la xornada añal nel Muséu del Pueblu d’Asturies qu’entama pa ufrir a la ciudadanía un día en llingua asturiana dafechu queden llueu pal disfrute de los más mozos, que les convierten n’auténticos himnos, col exemplu de ‘¡Préstame pola vida!’, ‘Entaína’, ‘N’asturianu sumes’ y ‘¡Espoxiga!’.
Esti añu esti día tan especial va celebrase’l sábadu, con una programación amplia. Ente les novedaes, ta una exhibición de valtu, la llucha tradicional asturiana que dende la Federación Asturiana de Llucha tán potenciando nos años últimos, programada pa les 13 hores, o una charra sobre'l cosplay.