El balón volea protagoniza’l pallabreru nuevu de la Oficina de Normalización Llingüística de Xixón

El Pallabreru del Voleibol

El voleibol, tradicionalmente balón volea, ye’l deporte que protagoniza’l pallabreru últimu asoleyáu pola Oficina de Normalización Llingüística de Xixón. Amás de dar a conocer esti deporte y el so vocabulariu específicu en llingua asturiana, esta obra busca otorga-y visibilidá a la muyer na práutica deportiva.

Tres espublizar hasta una decena de pallabreros sobre disciplines de gran tradición na ciudá, como’l fútbol, los bolos, el ciclismu o’l baloncestu, agora toca-y turnu al balón volea. Son munchos los xixoneses que prautiquen o prauticaron esti deporte, con xugadores que compitieron a nivel internacional o momentos históricos a nivel de club, como la participación del Esmena n’Europa o la temporada con trés equipos na Superliga femenina.

Mireya Delgado encárgase del prólogu del pallabreru, nel que s’espliquen les regles, les diferentes modalidaes y s’espresen términos propios del deporte n’asturianu, dando un especial protagonismu a la muyer nes ilustraciones. El pallabreru pue recoyese de baldre, asina como otros dispobibles, na Oficina de Normalización Llingüística, asitiada a la entrada del Centru de Cultura Antiguu Institutu.