Educación pon en marcha una campaña informativa pa impulsar la matriculación en Llingua Asturiana y Lliteratura y en Gallego-asturianu
La Conseyería d'Educación y Cultura va poner en marcha, esti llunes, una campaña informativa pa impulsar la matriculación en Llingua Asturiana y Gallego-asturianu, nel so ámbitu, con los lemas “yo apúntome, piensa en futuru, piensa n’asturianu” y “eu apúntome, pensa en futuru, pensa en gallego-asturianu”.
Pa ello repartiranse carteles y dípticos en tolos centros educativos sosteníos con fondos públicos del Principáu d'Asturies, tantu d'Educación Primaria como d'Enseñanza Secundaria y Bachilleratu. Amás, na web www.educastur.es podrán descargase los dípticos y los cartelos. Esta iniciativa recupérase dempués d'unos años ensin realiazarse; la última vegada foi en 2013.
La enseñanza de la llingua asturiana empezó a impartise oficialmente en 1984 en diez centro educativos públicos, que fueron aumentando nos años socesivos. Na actualidá imparten enseñances de llingua asturiana y gallego-asturianu en 335 centros educativos.
La llingua asturiana ye una materia del currículum, que puede estudiase en tolos centros publicosy concertaos d'Enseñanza Primaria y Secundaria. Con ella, el Gobiernu del Principáu d'Asturies quier amosar el so sofitu a la enseñanza del asturianu y, nel so ámbitu, del gallego-asturianu, promoviendo la conocencia d'un fechu cultural que contribúi a la formación integral del alumnáu, respetando siempres la llibre opción y la voluntariedá del so aprendizaxe.